美國唔單止減息，仲想用行政手段救樓市，上周五傳出消息，美國政府牽頭、與按揭公司一起研究如何拯救次按業主，計劃凍結他們的次按供款息率，延遲加息年期，為次按業主解困，最長可凍結息率7年，料本周初公布細節。
有網友問起近日美股反彈，為何我還說它是熊市？我講的熊市，是一個好長的概念，現在才剛開始，不是股市有點反彈，就說它無熊市。美國政府採取行政措施救市，未能從本質上改變樓市向下，只是阻慢其跌勢而矣。但只要美國的熊市不是崩潰式下跌，暫時又唔會改大陸牛市的本質，雖然A股仍在深度調整中。
我本來想開始講吓投資組合，方便大家組織一下明年的投資大計，但講組合之前，還想先講講一些基本的概念。話題是由網友ming問網友金曹的一個問題所觸發，他問：「Bro Kam，I started to speculated ( I thought I were invest in stock market in the past) for about 2 yr. I paid really plenty of time to " learn" about "stock picking" , but the result ............. Although I haven't loose in this 2 yr , the return is not so good as at such bull market .I just want to know the steps to "study" how to become a value investor. I read some books about such topic but not much improving. Maybe the most differnet thing for me is calculation however I know that the accountant may not good at stock market .
I 'm in doubt how to start ? which is the right track for me ?how to interpret the news/annual report and predict the market reaction? how to dig out the information form annual report ?....?...??? HOW????? Had you got such problems when you were green in stcok market ? please show me the way to the right track . many many thanks．」
（網友Ming的問題意譯如下：我過去有在股市投資，但兩年前開始投機，我花很多時間去學選股，但過去兩年雖然無輸，但回報和這種牛市不成比例，我想學習如何成為價值投資者。或者最難的是計數，但我又知會計師炒股都唔係咁叻。究竟可以從什麼地方開始？）
可能不少新炒股的網友，都有阿Ming同樣的遭遇，唔知點解在大牛市炒股，都唔係贏到咁多錢，所以他把思維轉向選股，想揀到好股。
有些人經常講一句話：「炒股唔炒市」，陸羽仁有點懷疑，這是只唔睇市、或唔識睇市的托詞。投資可以相對唔炒市，投機絕對要炒市。投資者認為中石油（０８５７）１０元以上係貴，要沽，佢可能五年後啱。投機者在中石油見頂回落跌定後，在１３元、１４元時去買，佢可能五個月後啱。投資者要發掘優質但價錢大落後的股份，例如１元、２元的中石油，買入長期持有，幾年、甚至十幾年都唔估，好多價值投資者的口頭襌是「如果問我持有一隻好股的時間段應該幾長，我希望是永遠」，價值投資者可以「相對」唔睇市，因為跌市他的好股仍有可觀盈利，仍然派息，有得守。但投機者只睇短線，甚至一些基本質素好好的股份，若無人炒，他也不會買。
阿ming想做投機者，佢犯第一個錯誤就係成日諗住去搵股，隱含著他盲信買好股就會大升的假設。但投機是炒市、炒勢，呢期興乜炒乜，好難計數，亦無堅持，以最能反映大市變化的中移動（０９４１）為例，正如有人問點解中移動一天可以升１２元，市值可以升２６００億？我就話中移動的盈利無變，只是市場對股票的看法變了，咁簡單的事，點解要去解呢？
如果股市大勢向上，首先就決定是向上炒而不是向下炒；然後判斷吓佢係急升還是合理地升，兩者又有不同策略；再判斷吓呢期炒啲乜，究竟是香港地產股還是大陸紅色股，跟紅頂白一浪浪炒實無衰；還有就是若大市升得顛，巨股一日升一成，它們的窩輪一日升３、４成時，仲搵鬼去炒４、５線的雞股，你在早兩個月買咗雞股無運行。到巨股無升得咁顛，雞股的莊家才會發力炒吓。
這是一層一層的分析，要諗得清楚；若你炒股無清淅概念，唔識去睇大勢，好多時只是盲炒而矣，今日撞中好開心，明日就俾人食你夾棍坐哂艇，高追低沽，中二隻衰一隻，投機業績時好時壞，在牛市中，盲炒者可能不如一個盲揸者。又舉吓例，你買了新股中外運和重汽，佢地本身質素都有相當，只係衰一個貴字，你炒新股跌了要止蝕，去買第二隻又唔中，業績就會好差，另一個盲揸者唔怕，死揸，若大市基調向好，長線向上，也可以揸到有錢賺。
唔好講太遠，再去番主題，炒股必須炒市，跟住大市進退，順勢而炒，適可而止，咁o既牛市業績唔應該差。如果睇業績知道自己未識炒股，想轉番多啲做投資，唔做投機，點講都要睇睇公司的基本因素，要了解公司大勢係唔係向好，核心業務純利係唔係向上，阿Ming話會計師唔等如炒股叻，呢個講法唔係錯，會計師炒股唔一定叻，因為炒股唔使計數好叻，但會計師如果做價值投資，可能易過普通人，因為他們較識睇上市公司盤數；你唔識唔緊要，想做價值投資者就要學吓睇數，更關鍵的是要睇吓公司的生意是走上坡還是走下坡，這才是最重要。
在較平淡的市況中，價值投資者容易取勝，但在大牛市中， 理應是投機者出頭，若在大牛市投機都唔得，就要控制自己投機的注碼。記住炒股先講方法，後講冧巴。
美股略回，市場有點憂慮樓市下跌的影響及工業生產衰退，道指跌５７點。我就維持在１１日聯儲局議息前美股向好的預測，估計暫時只是大漲小回。
講起投資方略，不能迴避你想投資抑或投機、想做老鼠抑或做綿羊的問題，我一直叫大家分清「投資的我」和「投機的我」，就係想大家諗清楚想做乜，同時做老鼠和綿羊都得，但買入每隻股份前，都要想清楚自己的目標。
網友小魚兒提咗個問題幾有意思，佢話股市咁高，買股咪永遠唔可以長揸？佢o既問題係咁：「我是一個股壇新人，剛剛在樓宇買賣中賺了一筆錢，又遇上這次大調整，就急急入市、慌死買唔切，買咗一大堆，依家又驚個市再跌。完全合晒你們所說的小散戶心態。(其實我都做了少少功課，睇見各大師都強調要入大型和龍頭股，同綜合了一些大師的心愛股，左聽右聽才買了以下的股票)。」
她買入長實、恒生、中移動、中交建、平保、國壽等股票）以上的貨都是在最近買的，但都不是最低市時入，那我是否應該全部放入「投機部」？我是想持有至明年中或更長時間的，可以嗎？若根據陸sir所說，我的股票全部的價位都咁高，是應該短抄的，那麼我不是永遠也不能長期持有任何股票？」
我一下子用了80%流動現金，是不是不對？我依家好驚個市再跌，我應否減一些，應該減去哪些呢？但我又不等錢用，是否可以換馬呢？你們Feel到我好矛盾嗎？」
陸羽仁過去亦俾人問過類似問題，問我在年中７月２３０００點時叫過人沽，為何最近跌穿２７０００點又話可以揸？這個問題其實同小魚兒問的問題類似，現時的股票睇落都是高價，現時買的股票是否一定不可以長揸呢？
其實我天天在報上寫稿和寫網誌，如果完全不理大市走勢，只講價值分析，你睇十日就會悶死。股神巴菲特唔同，佢一年出場一兩次，出來話話論基本價值股票太貴，你仲覺得係善意提醒，但如果日日都有人提醒你，那個人就會變成你阿爸阿媽那樣，雖然你好尊敬佢，但會覺得佢好煩，呢份工作都唔係好啱我做。所以啱「投資的我」聽的話，好難經常講。
但從「投機的我」的角度，順勢而炒，就日日都有好多話題。香港股市跟大陸，處於一個大牛市中，一浪一浪炒上，但炒得太急，又會回一回，好多時這些深度調整，有外圍因素，亦有人為因素，如果能大體上捕捉這些波浪，順住去炒，應有不俗收穫。所以我見到接近短期浪頂時，通常都會睇淡少少，有人問起，就會叫人沽吓都唔妨。到調整番落來，再有人問起，我又會話買吓都唔怕，你現時再問清楚我究意是投資還是投機呀？我會答「投機性吸納」，在２９０００點時，新入市買最熱門的股票，即使我話自己係價值投資者，你都唔好信啦。
又舉中石油（０８５７）為例，巴菲持在１０至１２元沽了大量貨，即係話從一個價值投資者的角度來看已經太貴。但中石油上A股，H股借勢炒過上２０．２５元，而家回番到１４．９８元，你如果你價值投資者，當然唔好買，因為全世界價值投資最叻嗰位仁兄都沽咗貨，你仲點能夠去接貨。
中石油變成大陸A股的權重股，佢唔升大陸股市指數好難升，上證綜指現時４８００點，假設大陸股市未死，調整完又會大升，呢個大浪升到８０００點才爆破，如今還有６７％的升幅，中石油A股現價已跌返到３０元人民幣，若和指數同步升６７％，可以升到５０元人民幣，H股打過７折可以升到３５元，打個５折升到２５元，記住這一切只是假設，但若這一切炒作的假設實現，中石油現價雖然沒有投資價，但還有炒作的水位。
你在現價１４．９８元買中石油，即使兩個月後佢升番上１８、１９元，已有兩成以上升幅，都唔會改變你係一個投機者的事實，唔會因為佢股價升咗，你就變咗一個價值投資者，但唔代表你唔可以揸長啲，你甚至可以短線不進出，揸一段時間，但記住你只係「揸長啲」，唔係「長揸」，長揸可以揸５年、１０年，揸長啲只係講揸半年，一年，價值投資者在１．５元買中石油，即使買完跌穿買入價，可以愈跌愈買，因為佢深明這隻股票的股價遠低於真正價值。但投機者在相對低價買入股份，買入後唔好愈跌愈買，買完就跌要止蝕。若咁好彩買完就升，短線升得太顛時，不妨減持一部份，或定止賺位，回吐到咁上下就要止賺，沽完博佢回吐又買番，食佢下一個浪。投機者買股票是順勢走一段，你好彩你跟到佢好長一段走１年２年，咁樣獲利就好深，唔好彩只能走幾個月就俾人震走咗。
當然，買得貨就唔應該太驚，一買就驚，一有少少利潤就沽，又會變咗贏粒糖、輸間廠的典型，大勢向好時，守得到咪守耐啲囉。
美股道指跌６５點，又係受次按困擾，不過跌得唔多，歐洲個別股市跌得仲多，跌１點幾％。外圍略淡，加上港股成交稀少，按理港股都要跌番少少，但昨日港股已表演一個反方向走動，主要由地產股帶動而上升，看來今日都不易調整。
想講吓投資組合，記得早幾日網友yy太問起，她買樓不成，追唔到價，想攞筆錢去買股票，我問佢接受到幾多風險，佢咁答：「我想我可接受5-6百萬, 輸3成至4成.(當然好傷心), 高風險希望回報高d 。(因唔買樓,不用供, 現yy生同我應重有10年是於自然工作時間及體力,及有市場價值的時候, 可再來過)。」
好多人買股完全唔考慮風險，我想教大家專業少少的投資方法，首先從考慮風險開始。你想像一下，全世界咁多有錢佬，都係搵人幫佢打理投資，最普通是買各種類型的基金，但買基金之前，有錢佬一定要先選擇自己能接受到的風險類別，有錢人不會將所有錢全部投在高風險類別，萬一輸哂點算，所以最普遍是將大量資金放在風險較低的投資，然之後將少量資金放入高風險類別去搏高回報。
有錢佬投資的高風險東西，主要是對沖基金和私募基金，那些基金除了收取基本的１％、２％管理費之外，基金經理還要在基金每年盈利提取約２０％分成，佢地收咁貴，闊佬仍去投資，當然要博好高的回報。而對沖基金和私募基金多如牛毛，一唔得做兩三年就出局。
普通人投資當然唔好搞得太複雜，唔好分得太散，但有風險意識，絕對重要。一般情況，都係年青啲可以接受高風險啲投資，年長啲就要穩健啲，道理好簡單，年青人累積本金少啲，輸起上來無咁多，而且年紀尚輕，輸咗可以搵過，但年長者如退休人士，係得咁多，輸咗搵唔番，只能保守啲啦。
YY太說她可以接受３至４成虧損，這是很高的數字，她的風險胃納很大，當然也希望獲得高回報。我估一係YY太兩公婆做的生意非常好，賺得多，唔怕輸，覺得輸咗可以好易搵番；一係YY太追唔到價買唔到樓，見樓價升咗，比佢初時想買的價錢升咗幾百萬，有啲氣頂，所以希望買股追番。
若是前一個原因，收入好高蝕得起，無得好講。若是後一個原因，只是在一種投資類別無賺到錢，希望在另一種投資類別追番，這種心態要戒，因為財不入急門，你愈心急，愈係會做錯決定。我想話俾YY太聽，你賺５、６百萬的快樂，不如你輸５、６百萬的痛楚，輸錢真係好痛，陸羽仁就有此經驗，連續賺錢好多個月，到一個月輸錢時，都會好痛。所以話能忍受輸幾多錢，都要諗真啲好。
YY太你唔好去搵投資顧問，否則你單生意太易做，小心被騙，因為你可以接受高達４成虧損，風險胃納極大，我係顧問就建議你去買H股指數基金，國指現價１７１９５點，跌４成係１０３１７點，大跌都應該守到這個位。證券界對國指前景看法分歧，有大行將國指明年目標都係定係１７０００點，但亦有大行睇３００００點，現價買入，升３成、４成都唔奇。
美國公布救樓市計劃，美股再大幅反彈，道指再大升１７４點，升幅１．３％，升到１３６１９點的水平，又向著１４０００點的高位進發。
美國政府的計劃提供三個選擇予做了按揭的業主，包括凍結利息，重做新的按揭，以及借取聯邦房屋局支持的貸款，估計最多可以有１２０萬美國業主受惠。政府的計劃出來後，美國市場憧憬能解決次按危機，所以股市急升。
上一日美股急升１９０點後，港股跟得好少，只升２００幾點，仲見到有啲人見高減貨，但美股再急升，應該可以推港股上一個台階。
再談投資組合問題，網友Elle寫了好長的問題，問如何設立投資組合，她的留言如下：
「Dear Luk Sir,
May I get some help from you? I have been trying to work out what should be my portfoio in terms of asset class and geographical allocation for 2008. Over the last 10 years, I have been really conservative in building my portfoio. You know, by controlling expenses and expending income.. have been doing alright with it... until this year... when there is an inflation buildng up and looks like we just entered into an era of inflationary economy globally. As such, I could not sit at the fence as I used to be.. and here I am.. picking your brain....
My overall target is to have a steady growth of 10% for the next 10-20 years, so that my wealth could double in 7-8years' time (excluding saving from regular income) and double in 15-18 years 'time from now. Risk appetite.. about 5-8% loss is acceptable threotically for a growth of 10%.. technically.. worst comes to worst, I suppose I am contented to earn as much as I could make out of the bank... and of course, capital protection is big in my mind...
My existing portfolio is not fancy at all and here they are:
1) securities: 16%
2) properties: 10% ( I am lucky as rental>mortgage)
3) Bond: 4%
4) cash: 68% ( of which 20% is in USD and 8% in SGD.. I am in deep sh*t I know..)
Briefly counted, I could contribute about 15% saving every year from steady regular income.
If you were me, how would you allocate your resources to achieve the required growth?
Asset class candidates:
1) bond & Euro, Europe securities ( low risk. 3-5%)
2) NZD, RMB,
3) HSI ( include stocks), Malaysia, Indonesia, Korea and Taiwan ETFs. (10-15%)
4) A50, Emerging Europe, Africa, Vietnam, Natural Resource, South America.. high risk ( 20-35%pa)
5)HK, Vietnam, Singapore and Taiwan properties ( highly leverage, but HK has been up so much, upside could be limited and i.e. high risk.. Again.. you never know.. upside ( but so as the downside) could be more than 40% with the leverage.. but not as liquid as securities and very high maintenance cost (in terms of time, adminstration and money)
Sorry that I have written so much. I have been thinking about this for the last 2-3 weeks but comes to no conclusions. As I am a new comer... your valuable opinions will be definitely a big help...
Thank you for your valuable advice in advance..
Cheers,Elle」
簡單意譯如下：Elle過去投資比較保守，有６８％是現金，１６％是股票，１０％是物業，４％是債券，她想重建投資組合，希望有穩定的１０％年回報，讓她在７至８年可以把投資翻倍，她的風險胃納偏低，只接受到約５至８％的損失，她問可以如何建立投資組合，她問到股票、債券、物業等不同資產類別，亦問到不同地區的市場）
陸羽仁經常講，建立投資組合，首要問的問題是你可以接受多少風險，然後才問你期望多少回報，定好目標，才決定如何投資，所以Elle的思考方式十分正確。
倒過來說，很多人買股不問風險，亦唔知自己想有幾多回報，只想買股票贏大錢，咁買法就是完全賭運氣，踫巧他入市的時機好，都可以贏大錢，正如買六合彩都有人贏大錢一樣，問題是你有無咁好彩可以長贏而矣。
睇完Elle過住的投資，有兩個感覺。第一，她是保守型，很怕風險，但保守不是壞事，她可能已跑贏另一半爛賭又唔識賭的炒股者，因為另一半人本金都保唔到，經常輸錢。大陸有個統計，咁大的牛市，仍有七成散戶輸錢，所以對這七成人來說，竟然是一句老話：「不賭是贏錢」，Elle已跑贏這些人。
第二，若從一個積極投資者的角度，Elle組合的好處亦是壞處，此組合過份保守，現金太多，近七成是現金，現金放在銀行，收取微末利息，正常利息只和通脹同步，即係話加埋通脹實質回報等如零，如果遇上現在這種負利率的年代，假設有１％負利率，組合每年就以１％實質減值。再加上港元跟美元貶值，如使用外匯的需要較多的人，如經常買外國貴貨、旅行、外出求學、外出投資等，資產實質貶值更多。
講到投資組合，今次先講資產類別問題。著名的投資人有一個觀察，以二、三十年的長線計，股票投資優於存款及債券，記著他們是在美國這種成熟型經濟，都是這樣，在增長型經濟（如大陸），這個情況將更清淅，簡單講在銀行存錢長線唔著數，銀行主要盈利就是從賺存款者息差而來。
我附加另一個觀察，對不善選股投資的人來說，在增長型經濟（是大陸而不是香港），買樓也是很不錯的投資，因為樓價長線受租金收益支持，租金收益長線和經濟增長同步，例如大陸未來１０年能維持GDP年增長１０％，其租金亦應同步增長，換言之樓價長線亦應同步上升，不過現實上樓價有時升過籠，有時升唔夠，偏離了價值線（租金收益增長），但長線仍是大體仍是沿價值線向上。
買樓有一個明顯的好處是有槓桿，我現在去廣州買一問珠江邊江景的１０００呎單位，假設是１４０萬（５年前是７０萬），出三成首期４２萬，借９８萬，租金回報若可以頂得住供樓開支，即係話我投入４２萬之後，不用加錢去供，就可以控制一間時值１４０萬的樓，等佢升值，又假設樓價以年平均１０％速度上升，第一年升了１４萬元，以投資入本金３３萬計，回報是３３％而不是１０％，所以在快速增長的經濟，以合理價格，買入地段優越未來供應極其有限的物業，買入不理升跌死揸１０年以上，對笨笨地的投資者來說，可能是回報最高風險最低的投資。買樓有另一樣好處，是進出較困難，不易在跌市中手手痕痕就把優質貨在最平時沽掉，但買股進出容易，較受市場氣氛影響，好易在淡市清貨。
港股上周四、上周五走勢好唔靚仔，已證明有強手在近３００００點的位大手出貨，這印證了較早前一個估計，唔好簡單地以為這次反彈又可以如過去那樣一舉穿高位（３１９００點），由於上次高位被大陸資金推高了，所以今次彈到咁上下會回，但回吐勢頭仍甚急，散戶唔識走高追了創新高的熱股，好易被套窂。
美股上周五無大變動，但經濟數據不錯，減低了本周二美國聯儲局減息０．５厘的希望，減息０．２５厘已成定局，由於大幅減息機會渺茫，美元亦在反彈，油價又急回，周二的各種減息效應提早反映出來。
講番投資組合，網友Elle想分散到不同的資產類別，但Patrick就話太多不同資產難掌握，都係集中買港股，但分散買不同股票以降低風險，其實兩個人講的話都啱。理論上Elle啱啲，因為若可以全世界咁去搵不同資產類別分散投資，按道理風險可以較平均分散，好多有錢人都係咁做，問題是一般人資金較少，又沒有時間研究，要分散不同資產、不同市場投資有一定困難，所以又會產生Patrick的想法，集中買港股，分散買藍籌和高增長股，都有少少分散風險的效果。
陸羽仁有幾點觀察：
第一，以長線一、二十年計，買樓買股，升值會比買債券、貨幣、黃金多。
第二，分散市場投資不易，投資海外資產，較難積極管理，所以投資海外以房地產這些不動產好一些，因為不用經常進出，揀較低位入市，揸佢五年十年，博有多點回報。
第三，集中投資一個市場，例如買港股，好易由投資變炒股。
第四，散戶知識不足去炒股，大市好時短線有高回報，但花無百日好，股市好幾年又會變差，小心長線會輸番突。
所以陸羽仁的結論是如果你把所有資產放在香港股市，你要有高EQ和自制力，否則長線未必好過放在銀行。
網友myself有個回應，我想和大家分享一下，他這樣說：「小弟真的很喜歡看陸sir的文章，看陸sir的兩本書和blog，看自己，看看網友，越看越了解自己之餘，亦從心裡佩服人家真的有一套，不論是投資或投機，新手、高手就是不同，股票賺錢低買高賣，看似簡單，人家背後真的下了不少功夫，買賣技巧可以學習，心態上的不同更能分出高低。」
「新手有通病，人從畢業到工作有錢，便會開始買股票，心態上要說服自己，我們都是平凡的大多數，有大多數人新鮮人通病，有一般人的弱點，一個人的病唔係通病，一大群人的才是通病，買股有通病會輸錢，投機市場，零和遊戲，100個有通病的人，每人輸1萬，人家高手就賺你100萬，香港有通病的散戶又點止100個，每人又點止輸1萬，有咁大筆錢，自然會吸引有心人(大鱷)來搵食，還記得陸sir引股場老手說，太平山下最多是什麼人嗎？」
「高手入市，低位分段建倉，買保險，有計劃去賺，更有計劃去輸，出入有度，一套『長賭必勝』的手法，由於方法正確，有輸有賺，把次數拉長總的是賺。散戶單天至尊，死煲一隻股，反彈差不多到接近上次歷史新高，才入市「博反彈」，有賺有輸，方法錯誤，甚至係冇方法，有賺有輸，把次數拉長總的就是輸，重是輸到要離場。新手沽得最盡時，高手開始分段入貨，新手好樂觀去追貨時，往往高手就開始分段出貨，不知道是否對著幹，但這種現象的確經常出現，難怪人家說股場是財富轉移的地方，財富由弱手轉到強手，最終是富者越富。」
「買股賺錢，唔可以好科學去分析，記得小弟讀大學，在實驗室做生化實驗，要研究甲對乙的影響時，會把其它所有外在因素保持相同，只會改變甲，去看甲對乙的影響，得出結果後，再重複幾次，看是否得出相同結果，這叫科學。股市不同，一來唔可能把其它因素控制不變，亦不可能把單一事件，作不同試驗，聯儲局唔可能話試下減0.25%，唔得就時光倒流，試下減夠半里睇下點，股場天天在變，更莫說加入了個人心理原素，更難去掌握。」
「投資相對上可以減少不確定性，做隻羊在高原食草，投機便不能避開不確定性，做鼠有做鼠的性格，要有策略去保護自己。」
從網友myself的回應，看到他開始明白股市運作的原理，明白散戶炒股為何這樣難長線賺錢。
所以網友說希望組合每年有１０％回報，我估有一萬個方法可以達到這個目標，但亦有２萬個可能令你不但達不到這個目標，而且還要輸錢。我在頭條日報的專欄都舉過這樣的例子，買賣中銀香港（２３８８）的股票，在跌近１８元時買，到２２元時沽，過去一年有４次這樣的機會，你做足４次不是有１０％回報，而是有８０％至１００％的回報，但講就易，做就唔易，因為正常人買股，低位不想買，高位不願沽，明知有一個方法，都好難執行得到。所以組合若以股票投資為主，想要每年平均１０％的升幅，談何容易，這等如好市時有１０多、２０％的升幅，以備跌市時的虧損。
而那２萬個令你不能達到投資目標的錯誤，主要不是大市走勢，而是自己的心魔，你無高手之能，就要學低手的方法，低手是要嚴格的方法規範自己，定出清楚的投資目標，按目標設計出組合，若組合不需進出，就要抗拒誘惑，死都唔沽。若組合需要進出，就嚴格按紀律進出，不要被自己的臨場判斷所左右，食夠就要走。記住，真正的高手萬中無一，但平庸的人成千上萬，你不要打敗高手，只要比成千上萬的庸手稍稍聰明一點、稍稍守紀律一點，就可以出線，你不是要打敗高手，你只要打敗庸手。
咁樣買股又好唔好得過買樓呢？
股市愈高，搵食愈難，這是千古不變的道理，在年幾前恒指１７０００點的時候，我講過投資組合，那時感覺很輕鬆，我記得當時大約係咁講，買股從買匯豐（０００５）開始，匯豐變成一隻上落股的趨勢幾明顯，所以當時我話想賺多少少，買匯豐不妨進出一下，一年收息加賺差價，１０％回報不難達到；要求高一點，就在組合中加一半紅色巨股，隨時有１０幾、２０％回報；若想博得盡啲，全部買紅色嘢，一年２０％回報有可能。
其實設計投資組合，有一個重要原則，就係要先考慮自己能承受多少風險，即係你能承受多大損失，這個原則比考慮自己想得到多少回報更重要；在現實生活裏，風險和回報成正比，想要高回報，就要冒高風險。
一年多前講投資組合時，沒有太多強調風險，不是風險不重要，而是那時的市況風險相對不高，稍加留意即可。但到今時今日，恒指已處於２７０００點的水平，雖然高處未算高，但不能不叫大家更加要重視風險。
如果是公司去投資買股票，一定要年年計數，控制風險的要求更高，私人投資寬鬆一些，可以唔年年以市價計現值，但買股票即使忍得佢跌，亦要佢將來有機會上得番入貨價才可接受，舉一個例，如果我今日１３３．６元買匯豐，雖然明知佢有次按問題，明知佢美國業務較多，但估佢衰起上來大跌，跌穿埋１００元，過幾年佢都會上番１３３．６元，唔會好似美國嗰間安然，或者英國間霸菱咁樣，從地球上消失，假設買完匯豐衰足５年，５年後股價跌完升番上１３３．６元，計番每年收的４厘息，咁今回報仍有４厘（記住這不是對匯豐的投資建議），咁樣都叫做相對安全。
若先從安全的投資組合、或者組合的安全部份開始，就要想想那一些是比較安全的股份，遇上股災都跌唔死的股份，讓這些股份成為組合的一部份，賺取比較微薄的回報，但卻可以換來安全，投資這些股票會拉低組合的整體回報率，但同時會降低風險率。
但要找這些股票，並不容易，記得網友myself講過自輸錢的例子，佢咁講：「小弟有賺少少、輸多多既經驗。之前輸過在電盈(8)、有線寬頻(1097)[股價及相關新聞] 、中芯(981)[股價及相關新聞] ，全部輸超過50%，輸大錢，因為炒股唔識止蝕，以為投資股票梗係要長線架啦，果時心諗：「畢菲特都係長揸賺大錢啦！短期波幅唔使理，我係長線投資者！」，結果真係好長線，電盈揸7年(輸8成)，有線揸6年(輸9成)，中芯好的，揸2年輸6成。當你買入隻股，得番2成錢，你就會覺得沽都無謂，真係可以好長線咁持有o架。自己唔了解隻股，高價買錯股唔肯認，用投資的心態去投機，真係抵輸！」
你睇番Myself買的股票，雖然都曾經係熱門股，但唔可以話係純炒股，有線剛上市時前景好亮麗，中芯上市後跌咗一半時好多人都話見底，電盈更加唔使講，由２８元高位跌下來（曾經５合１，以現價計是１４０元），跌落來時每一段都有人話好抵好抵。這三隻股，都有可能永遠上唔番myself買的股價，派息又唔係多，若組合搵了這些股票做膽，都會幾慘。
Myself話自己「用投資的心態去投機」，的確無錯，他不是想去買純炒股，只是在價位好高、炒味幾濃時買「實業股」，結果可能比買炒股更慘，因為買炒股你懂得止蝕，買有大生意做緊的公司，你對佢有信心，覺得跌咗會升番，就不會去止蝕。
網友按基本因素睇公司，但對那些行業的情況不太了解，如電盈和有線，在最亮麗的時候，就是他們開始失去壟斷或近似壟斷地位的時候。當年電盈前身香港電訊接受港府賠錢幾十億，提早結朿國際通訊（IDD）的專營權，早已進入戰國時代，當時的母公司英國大東睇透呢個局，所以才願意把生金蛋的鵝高價賣給小小超。
而有線寬頻做有線電視雖不是專營，但其他其個競爭者放棄經營，搞到有線在一個階段享有等同專營的地位，但由於不是真正專營，政府隨時可以再發牌，地位本已脆弱，生意一好賺就易吸引對手入局；後來電盈和城市電訊睇到法律漏洞，用電訊網做收費電視，連有線電視牌費都唔使俾，電盈一開始推出Now TV，有視電視的惡性競爭時代馬上開始，有線寬頻就無運行，股票死得。而中芯則是台灣同業在內地的移殖體，上市時沒有經營往績，即使上市後一段時間，它能否長期在行業生根，仍未清淅，風險更大。散戶唔係做這些行業的生意，即使想研究基本因素，都只睇到目前的數字，好難睇得通行業的大勢變化，所以好易入錯貨。
所以要為穩健組合搵隻股責倉，並不容易，過去可以搵匯豐，而家匯豐因次按問題風險上升，可能也不是低風險的選擇了。
美股又插，道指昨日再大跌１７２點，跌幅１．３％，跌至１３１６７點，表面看無甚特別原因，只是能源股怕美國衰退帶頭下跌。美股下跌的時間比想像中快咗少少，速度亦急，又會拖住港股向下。
好多朋友問港股跌到乜位見底，上月２２日的２５８６２點顯然不是底，所以唔好咁快去撈底。若大陸股市無重大利好消息，港股大方向跟美股，道指在下次聯儲局議息期前（即明年１月３０日），又會再試短期低位１２８００點，未見到道指跌到這些水平，唔好估港股見底，正路估道指在１月初會試低位，如果唔係更加早o既話，所以在此之前，唔好估恒指已見底。明年第一季估計恒指會在２３０００點至３００００點間炒作，炒作區間下移，回到較「正常」的水位，基本上是外資大戶玩慣的巨型波幅。會唔見２３０００點，先要看呢個月穿唔穿上月低位２５８６２點，如輕易跌穿，已確認一個月比一個月低的走勢，下個月有機會試低位，如果今個月唔穿上月低位，未來的低位可以睇高少少。若果未來一兩個月真係不幸跌到２３０００點、甚至跌穿時，就要看是暴跌式穿位還是插插吓穿位，才能判定是否股災。
來這裏看文章的朋友，心態千百樣，有些好短炒，有些極長揸，但現時的市況，雖然不能排除有反彈，但明年初美股試底的壓力又至，除非好短炒，唔係好難博。
昨日講到低風險投資，最多人會諗的是在低位買強勢股票，但這也是最難做到的事情。股市指數愈高，低風險的投資機會愈少，但指數回落後，低風險的投資機會增多，在３００００點買股票的風險很高，只能投機短炒，若果真係跌到２３０００點，會安全啲，萬一跌到２１０００點，更加安全，但跌到這些水平時，你的感覺會覺得好唔安全，好唔敢買，反而在３００００點你會放心買。股民的習慣係咁，愈低風險，愈唔敢買。
你可能會問，若未來一，兩個月真係跌到２３０００點的時候，怎知不是股災呢？股災來時有個樣。遠的不說，８７股災，９７股災，２０００年科技股之災，有些特點，第一，主要是外來因素，好多時是美股成災所帶動，當然今天香港也要留意大陸股有無災。第二，股災的跌幅一來就好驚人，以港股計，一開始一日就跌一、兩成，甚至可以一日跌三成，比較少是慢跌，以現時恒指的點數計，一日要跌三千點、五千點，見到咁既跌幅就應該股災到，無得唔走。
當然，即使在真正的低位撈貨，還是分注入較好，一邊入一邊判斷有無大災難在前面，而且撈完亦要認真睇睇使唔使止蝕，若到位止蝕，可以先打靶，低位再買。
低位買股始終有一定風險，但風險與回報亦成比例，如果真是在低位買到龍頭強勢股，一年兩三成回報不難達到，但由於低買龍頭股不易做到，或者不易把握到好價位，所以控制這種投資風險的最好方法，還是控制注碼，例如以一個４０歲以下的「青年投資者」計（香港的傑出青年參賽標準好似係４０歲以下，所以這個年齡之下視為青年），這樣低買高賣的高風險投資，可以佔一半，年紀愈輕，比例可以愈高。控制較高險部份投資的比例，等如主動把自己降級，我覺得陸運會可以分初級組、中級組、低級組，買股票亦一樣，新仔投資，應該參加低級組，風險少啲，回報亦都少啲，但好多新仔一入市就加入高級組的遊戲，不只買熱門股，仲炒窩輪、炒期指、炒期權，和高手作賽，風險之高可想而知。
當你自己覺得技巧純熟，時常可以捕捉到時機，低買高沽，即使是６０、７０歲，就１００％買哂熱門股都唔拘，自認有高級組的身手，不妨玩高級組的遊戲。不過我可以咁講，低買高賣是所有買股人的目標，但多數人做唔到，有時做到只因為大市好，或者那時好運而矣，所以控制這些投資的比例，自願降低比賽組別，犧牲一點回報，就是控制風險的最佳方法。
而組合另外一半，可以買平價優質股，也可以投資一些穩健收息股，明天續談。
歐洲央行對市場進行史無前例的大放水行動，向銀行投放３４８６億歐元（即３９１１７億港元）兩星期貸款，利息４．２１厘，行動一出，立即大幅推低歐洲的兩星期銀行同業貸款拆息半厘，至４．４５厘，震動世界。
歐洲央行借出３９１１７億港元，這真正是天文數字，據說這數字比歐洲央行原先估計多出一倍，顯示市場多麼渴求資金。英倫銀行亦按早前公布的計劃向市場投放第一筆三個月貸款，而美國聯儲局亦於昨日投放第一筆一個月貸款。
歐洲央行驚人地放水，究竟是把災難結朿，還是把災難拖長，暫時還是一個未解的謎，但市場反應審慎，歐洲兩星期銀行同業拆息急跌，比６月時只高０．０９厘，即係頗接近正常水平，但較長期的貸款利息仍處於高位；歐洲股市反應溫和，多數只是微升，一方面受央行注資行動刺激，同時亦擔心次按問題觸發的資金危機未解決。美股道指亦受刺激，上升６５點，升幅０．５％，升至１３２３２點的水平，美股彈吓，相信港股亦會彈吓。
今天繼續討論投資組合當中的穩定股，網友亞K早前問過投資合問題，值得一書，她問道：「陸sir, 07年將過去了, 我想很多網友,都像我一樣, 正去思想來年的投資方向, 自已定下的是15%年回報, 之前你在第一本書,講及用匯豐（０００５）來變通, 上2星期開始,你建議用中銀香港（２３８８）炒18元至22元的波幅, 亦可買入領匯（０８２３）,可否講多小小,實則的運用與操作.與佔比重, 又與其他大籃籌國企如何配合 。另外, 投機做老鼠, 除了要心態上要打敗庸手外, 來年,你認為有那類股份炒作的值博率比較高．．．．．
估計08的股市,波動比07可能更大更深, 投資或投機要獲利已不是像06年那樣, 盲毛求其選中一隻渣吓渣吓就取勝, 所以對選股與投資的心態要求更高。 陸sir,可否有空就為我們作個導修課, 去迎接08的來臨， 謝謝。
羊加鼠 亞K」
亞K對回報的要求不算太高，只希望有１５％，我將組合拆成兩半，一半買穩定股，希望有１０％回報，另一半增長部份，希望有２０％回報，兩部份拉平均就有１５％。先從買穩定股爭取１０％的回報開始講。
我要求穩定股能經大風浪，即使明天發生股災，穩定股股價大跌一半，但３、５年後，穩定股還能升番到買入價以上有突，這些股不會從地球上消失，講到消失呢個問題，不要以為我講得好誇張，好多公司的確消失咗，例如安然、霸菱、國際商業信託銀行、百富勤．．．部份係上市公司，做著佢哋的股東絕對痛苦；有些股份未消失，但股價跌到無影，例如電盈（０００８），只有高峰期的３％，股東之痛，比處死更難受。買穩定股就要避開公司消失或接近消失的風險。
過去我選的穩定股是匯豐，主要因為匯豐有較良好的管理，即使股市升跌，最後佢都好易企番起身。不過次按一役，匯豐的表現的確令人失望，業務擴展去美國，但沒有能力控制美國公司繼續亂搞，終於出事，要比較長時間受害，並蒙受較大的風險。過去我會好有信心話匯豐點跌都跌唔穿１００元，但現在唔夠膽咁講，匯豐失去穩定股的特性。（你想賭佢渡過次按危機，可以等佢再大跌後才買入，賭佢過一兩年復甦，但這是買增長股的買法，不是買穩定股的買法）。
退而求其次，穩定金融股我會選中銀香港（２３８８），穩定的房託股可選領匯（０８２３）或越秀房產基金（０４０５）。開宗明義要講，這些是穩定股，並非增長股，自問選股精明的網友，諗也不用諗這些股票，它們是超慢股，不合愛增長者的口味，但他們是穩定股，有幾個特點：
第一， 股價上落較少，升得少，自然跌得少，佢地無升過１０倍，自然唔應該跌到得番３％，即使遇上大跌市，它們的跌幅應該較少。中銀香港在０４年至０６年主要在１５元水平上下浮沉，到０６年中開始有升幅，但過去兩年主要在１８元至２２元中間上落，若在近１８元買入，下跌空間相對較少。領匯在今年３月炒過上２０元，但大部份時間在１５元至１９元間上落，若等跌市在１６元左右買入，下跌風險亦有限。越秀的波幅更窄，年初也炒過上３．３元，但主要在３元至３．２元上落，好多時近３．１元浮沉，若近３元買入，風險有限。
第二， 派息高。越秀房產息率７厘，領匯４．１厘，中銀香港４．３厘，單計收息都幾和味。
第三， 風險可控。三隻股論數字中銀香港的風險最大，因為佢現價PE成１５倍，等佢低一成才買也有１３．８倍PE，淨資產８４６億，現價市值２１３０億，PB２．７倍，亦唔算平，但勝在業務集中香港，唔受次按影響咁多，但香港經濟衰，佢會衰。買房地產信託等如買咗舊房地產，收益主要係租金收益，長線亦博物業升值，租金上升；買越秀房產，等如買大陸地產，佢市值３０億，但資產有３２億，股價仲有少少折讓，佢衰在細，發展有限，而且大陸房地產上市估價去到幾盡，大陸地產跌，佢有資產值下跌風險。領匯市值３６５億，資產值２６８億，股價比資產值有２６％溢價，表面睇唔係咁抵，但勝有物業估值無去到咁盡，所以實質溢價應無咁多。若香港經濟衰，佢啲公屋商場勝在夠Cheap，衰起上來有個譜，但佢班對沖基金股東好難搞，而家搵鬼佬主席兼鬼佬CEO，以夷制夷希望搞得掂。
這幾隻股份，遇上股災一樣跌，但股東坐喺度收息，等幾年股價應該可以上番去。買入死揸，收息應有４至７厘回報，若果睇啱收完息仍處高位，直頭游吓水，在高位沽吓，等低位買番，好運可以賺到１０％差價（越秀房產肯定無咁大差價），所以期望買這些笨股責吓倉，要求它們一年有１０％回報，唔係過份，做得好啲，單係買賣佢地，收埋息，一年１５％回報也有可能。毫不進出，揀低價買，收息加幾巴仙增長，拉扯都可能夠１０％。
記著這些笨股叻仔唔會買，你想有高回報，千祈唔好買佢哋，唔係買咗一年都唔郁，就番來搵我問，佢地o既最大好處，就係郁得少，只啱笨人買。
美國次按危機的壞影響，陸續在金融公司的業績浮現出來，美國第二大證券行摩根士丹利昨日公布第四季業績，大蝕３５．６億美元，遠高於市場預期，而去年同期則賺１９．８億美元，這是大摩８６年上市以來首次公布蝕錢的季度業績。業績咁差自然係衰次按，大摩為次按相關投資有巨額的９４億美元的虧損和撥備，亦遠高於市場所能想像。
不過大摩係投資銀行高手，識得控制投資者情緒，它公布壞業績的同時，亦公布獲得中國國家投資公司注資５０億美元，購入大摩自己的換股票據，息率９厘，換股後中國國投會佔大摩９．９％股權，成為大摩第二大股東。受國投入股的刺激，大摩股價升４．２％，而美股亦好淡爭持，道指微跌２５點。
大摩和大量金融巨企一樣，因為次按而錄得巨額虧損，其實至今只有高盛有３２億美元的季度盈利（部份由於它沽空次按產品所致），其餘美林、花旗、貝爾斯登、和瑞銀都為次按作大額撥備。蝕得多跟著就要低價賣股或借錢，貝爾斯登叫了中信證券入股，花旗用１１厘高息發換股票據俾沙地油國，今次輪到大摩向中國國投埋手。大摩今次用９厘高息發換股票據，雖然好過花旗的１１厘息，但９厘絕對唔平。國投用５０億美元投資大摩，坐定收高息，肯定好過早前直接用３０億美元買黑石股份，黑石上市後股價下插，那批貨如今跌了兩成，帳面唔見了６億幾美元。
再講投資組合問題，昨日有網友問陸羽仁，我過去好少提冧巴，為何昨天一講就講了三個冧巴（中銀香港、領匯和越秀房產），我的確係有意講冧巴，這是三個「笨冧巴」。
大家都知我的原則，就係盡量少講冧巴，坊間已經有太多專欄天天講冧巴，多我一個唔多，你要冧巴睇那些專欄五花八門，任揀唔嬲，但好多散戶睇到冧巴就抄，跟足專欄講的目標價買賣，成為冧巴奴隸，自己完全唔懂得分析，炒１０年股，唔夠自己用腦炒一年學到咁多嘢。投資唔可以懶，要自己用腦。
講番我嗰啲「笨冧巴」，其實我的確有意講吓，刺激大家思考一個問題，就係風險問題，估計明年起碼第一、二季投資環境仍然波動，風險增加，究竟自己炒炒吓，好唔好得過買「笨冧巴」呢？
明年有幾高風險，單講次按就夠，大摩的首席財務官Colm Kelleher話，佢地為次按作咁高撥備，是作最壞情況打算（a worst-case scenario），但歷史告訴我們，最壞情況打算通常都不是「最壞」。Kelleher睇法幾悲觀，佢話信貸市場仍然嚴峻，未來要幾季才能回復正常，在幾季內信貸會拖著整個債券業務的後腿。Colm Kelleher的講話值得注意的地方是他說「幾季」，過去美國金融界一直講在明年第一季可望解決次按危機對信貸市場的影響，但Kelleher話要等「幾季」，如今已是１２月，若他的講法正確，明年大半年都在信貨緊縮的陰影下生存，這就是風險所在。
我觀察網友們經常談論的是一些熱冧巴，意味著你們仍是處於一種大升市的情緒中，只看熱股，少諗風險，的而且確，過去一年，追熱股「只會買貴，唔會買錯」，買貴咗唔沽捱吓價，轉眼就升番突，但市場會變，投資者的心態亦應該跟著變，若股市由大升市變成上落市（都唔好講變成跌市，美國有機會發生咁o既事），盲目追貨唔止蝕，可能要付出好大代價。
合理點講，買笨股可以用較低風險方式取得１０％回報，但買熱股就只能冒更大風險取得２０％或更高回報，由於明年的風險會比今年高，所以買熱股需要更高的技巧，避過風險。
最後再講講「笨冧巴」，笨冧巴通常係派高息的穩定股，並非增長股，有網友提到恒生（００１１），這
的確是一個由穩定股變成增長股的例外例子，中銀香港（２３８８）有無咁o既機會，唔知，佢雖然攞咗南商個牌話搞大陸生意，但關鍵除咗佢自己有無雄心之外，佢阿媽中國銀行會唔會放手俾佢做，也是未知之數。
另外有網友提到國泰航空（０２９３），話佢都係在區間波動，網友要細心研究，國泰既面對油價上漲、區內廉價航空公司威脅及大陸機場爭奪航空貨運的影響，又有兼併了港龍的好處，一減一加比較難睇，但短期油價影響大啲，油價持續高企，國泰好難郁，若油價大跌，可追國泰。
其實笨冧巴有好多，關鍵要選到一些風險較低，抗跌力較強的股票，網友自己或者都精研一兩隻股票，佑道它們經常在較固定區間波動，若自己對這些股票有較深了解，炒吓波幅，炒吓業績，一年進出一兩次，都不難拿到１０幾美國股市在科技股帶動下造好，甲骨文公布的業績優於預期，令人相信經濟放緩無損科技投資，道指微升３８點到１３２４５點，升幅０．３％，但反映科技股的納指就大升３９點，升幅１．５％，升到２６４０點。外圍偏好，有利港股穩定。人行加息幅度溫和，料對股市壓力不至太大。
今日再講組合中的增長部份，目標是有２０％或以上的年回報，同時盡量控制風險。好多人買股自自然然就會採取博高增長的態度，想買到高增長股，最好升番一兩倍以上，但要買中這些股份，除了看眼光、運氣之外，還要看大市。
碧斯在《Hedgehogging》（對沖基金風雲錄）中，提到三種投資信條，１．成長，２．價值，３．不可知。所謂成長派，就是尋求那些成長型公司，主要指那些處於周期性特徴不大明顯的行業中、利潤良好、居行業領先地位、擁有優秀管理團隊的公司。理想的投資方法是持有這些上升行業中的成長型公司股票，直到行業衰落，賣出的原因不是因為股價升咗，而是因為行業衰落。
碧斯以二十世紀三十年代的投資家羅派斯作為成長派的代表人物，羅斯派這樣定義成長企業，「就是一個盈利已經保持長期增長的企業，在每一輪商業週期中均保持著超通脹的增長速度」。碧斯認為找成長型股票最大的困難是這樣，當投資者清晰可確定一隻成長型股票時，它的成長性多半已在股價中反映，換言之你只是高價買入好公司股票而矣，我們現在去買紅色龍頭股，就是這種情況，有時股價不只反映，係「超反映」。
另一派是價值派，他們喜歡便宜股票，喜歡表現差的公司，他們認為投資者好多時睇公司的基本因素去選股，但大多數都選錯，價值派買股價低廉的公司，透過低股價作為安全網，反而少犯錯。他們不會愛上公司，當他們買入的差公司開始好轉，股價一直上升，升到超越內在價值時，他們就會把股票沽出。價值派的代表人物當然是股神巴菲特了。
碧斯話按往績統計，價值派的表現勝過成長派，特別是投資小型價值股者，收穫最豐。不過碧斯講出一個第三派叫做「不可知派」，他就是這一派的信徒，他們不會死守一種投資方式，認為一切都是短暫的，當成長型股票相對便宜，整個經濟環境良好時，他們會投資成長型股票。當價值型股票價格低廉而成長型股票價格高時，他們會選擇價值型股票。有時，他會兩者都做。他們認為聰明的投資者會在價值型和成長型之間靈活切換。碧斯自己是一個不可知論者，但大多數情況下價值投資的收益較高，所以較偏向價值投資。
我自己亦覺得碧斯的「不可知論」較可取。在大牛市中，你去搞價值投資，買隻股半年唔郁，你會比佢悶死，不如追吓成長股算吧。但在一般的市況，搵吓價值股，守佢３、５年，會有可觀收穫。
講咗咁耐，想講我們建立組合的增長部份，到底係揀成長股定係價值股？到目前為止，我對明年第一季、甚至第一、二季的投資環境仍有戒心，主要係美國唔係好掂，而中國又宏調未定（起碼明年頭兩個月），所以估計明年初都係一個大型上落市，到明年下半年若外圍情況穩定下來，才有機會重拾升勢。所以明年初仍採取較保守策略，到明年下半年又可以進取一點，但整體應該還是尋找成長股為主，因為在這種市況下，也沒有太多平價的價值股可揀，而且把太多資金投向價值股，如果佢地唔郁，可能會跑輸大市。
在成長股中，已沒有絕對便宜的選擇，但可以揀相對便宜的股票。最唔駛用腦的方法，是候低吸納H股指數基金，在國企指數跌穿１５０００點樓下買入，最好近１４０００點，價錢相對合理一點，買入博三成或以上回報，以輸一成半來止蝕，以一成半虧蝕博三成利潤，有一定值博率。
當然你可以揀個股，博佢地超越指數，中移動（０９４１）、中海油（０８８３）、中石油（０８５７）、國壽（２６２８）等。這些公司是明顯的行業龍頭，若回落得較深時，有一定的值博率，但壞處是即使下跌後仍然相當貴。
做電腦的聯想（０９９２）值得大家研究吓，它是中國個人電腦的一哥，幾年前收購IBM的個人電腦業務後，大大擴展，不過一直在消化蛇吞象的苦果，早兩年相當消化不良，近一年有啲好轉，截至０７年３月的全年盈利１２．６億元，比對上一年大升６２５％（可知之前幾慘），現價市值６０４億，PE４６倍，計PE好貴，但早前剛公布至９月的半年盈利有１３．４億，比對上一年同期升１９８％，半年盈利超越上年全年盈利，若簡單假設全年盈利是半年盈利一倍，至明今３月全年盈利２７億，現價PE２２倍，以盈利高速增長的公司計，有一定的值博率。
從聯想過去一年業績來看，顯示消化收購過來的IBM業務有一定成效，雖然面對美國消費市場下滑的風險，但相信整合業務的協同效應還未充份反映，料可抵銷這些影響，它的股價雖不算便，但也粗具成長股的特徵，真正風險是未有持久盈利的往績，還會面對整合業務的波動風險。正因為它有這些風險，所以即使管理不俗，但相對其他龍頭股卻比較便宜。聯想股價波動頗大，在公布業績前多有炒作，只宜低吸，不宜高追，６元以下入貨較安全。
提出聯想這個例子，是希望大家研究，不是想大家盲目照跟，說到底成長股有一定風險，要自己研究清楚股份的風險。拋磚引玉，是想大家都思量一下，有無一些成長股我們可以考慮呢？
％的回報，不一定要跟我的「笨冧巴」。
美股道指大升２０５點，看來港股要衝高試一試２８０００點大關，港股大玩上落市，相信０７年都可去番高少少的位置作結。
上日講到組合的增長部份，並提到尋找成長股，這裏要補白一下尋找成長股的風險與機會，尋找個別股票，主要目的是要超越指數，我們的組合增長部份基本鎖定紅色股為目標，那麼增長部份的基準回報應該是低吸國企指數的回報，假設低吸國企指數可以有２０％、甚至３０％的回報，尋找成長股就希望有高於這個數字的回報，當然，尋找成長股亦有其風險，第一，成長因素若不能充份發揮，股價就有回調風險，第二，成長股不是價值股，即使潛力未盡露，也露了不少苖頭，股價以現盈利水平計難免偏高，理論上買任何股價偏高股票的風險都較大。
除了上週提及的聯想（０９９２）之外，今天想再講多一隻股票：國航（０７５３），國航是中國最主要的國航空公司，可以講是中國民航業的龍頭股，我們對國航有太多不好的回憶，經常走埠的朋友會認為國航的服務不敢恭維，CAAC過去一直被戲稱China Airline always cancel，這幾年雖有改善，但服務水平比國際一流的航空公司仍有差距。不過有個小故事值得一書，商品大王羅傑斯是國航擁躉，重手買入國航未曾出售，每次去大陸訪問都會去國航巡一巡，聞說他上次回內地時，想買吓大陸銀行股，亦曾過訪工商銀行（１３９８），但睇完之後覺得服務唔係幾得，買唔落手，如今有好多內地經紀行都有推介工行（可能因為它是權重股的緣故），不過在羅傑斯眼中，國航暫勝一局。
但睇番國航現價亦相當當貴，上周五收１０．０４元，市盈率２８．５倍，一年低位只是３．９元，這是去年底的價位，如今已升了１．５７倍，一年高位１２．７２元，現價仍然近高位。最近兩次跌市都守硬８元的位置，要買最好等佢回到８元才買。
點解我留意這隻貴股，主要是睇住國家的大政策，現時中國擺明走國家資本主義的路線，我一年多前已講過，國資委要扶植３０、４０間央企，令他們達到世界一流的水平，國家會以政策扶持，讓它們未上市的整體上市，其次就是讓他們併購其他國企。東航業績差，有意讓新加坡資金入主，搞番好間公司，國航也有意兼併東航，但事前雙方未搞好關係，目前新加坡資金應會入股東航，而國航若取得國家支持，將會整體兼併東航，若然成事，國航有望進軍全球最大航公司。
早前提到聯想，聯想最大不好的地方，是改制後民營味重，不再是阿爺要全力扶持的央企，但國航仍享有這個地位，而且還身處負載著國家榮辱的航空業，阿爺在關鍵時扶一把，絕對有可能。所以中國大國崛起，亦應有一間和大國地位匹配的航空公司才成，最後就要睇國航自己爭唔爭氣了。不過買入國航，首先就要冒它不能兼併東航的風險，但世界上風險永遠存在，正如你買聯想，也要冒它消化美國業務時再出問題的風險。
網友阿ray早前問起，「Mr. Luk話將組合拆成兩半，一半買穩定股，希望有１０％回報，另一半增長部份，希望有２０％回報，你覺得增長部份買入2800如何?整體回報和風險又如何?
另外，你覺得增長部份80%買盈富基金2800,20%買匯豐中國翔龍基金820如何?
又例如增長部份60%買盈富基金2800, 10%買匯豐中國翔龍基金820, 10%買A50基金2823, 10%買領先商品ETF2809, 10%買領先韓國ETF2813如何?這些不同組合的回報和風險又如何?你會作何選擇？」
首用我的思維邏輯來答阿Ray的問題，在增長部份，買指數基金比挑選個股風險低，因為買指數基金是買整個大市的升跌，一定程度分散了個股的風險，所以求穩者在增長部份應全買指數基金，要買個股亦只佔這部份不多於２０％之數（佔整體１０％）。
在幾種指數中，盈富基金的風險相對低少少，恒生H股指數基２８２８和A50基金２８２３，一隻買A股，一隻買H股，會比盈富進取，但風險同時高些。對一般網友而言，取其中候低買恒生中國基金２８２３，或等上證綜指４５００點時買A50，成為組合主幹，再加一點個別股票，風險相對可控。若年紀尚輕，資金有限，難太分散，在組合增長部份買一隻股票基加一隻個股都OK。
於翔龍中國基金、領先韓國基金和領先商品基金，翔龍中國基金並未有很清淅的往績，未敢下判斷。股神巴菲特睇好韓國，但韓國換了總統，要把GDP增長提升到７％，是風險也是機會，韓股回報或會超越大陸股市，但賭在一個人身上，不宜大注。商品基金也是一樣，已高升很多，雖然羅傑斯話再有十年牛市，但風險可能也不低於買大陸股市。在這三種貨色中，排序應是領先韓國基金，領先商品基金，然後才到翔龍中國基金，這不光是計回報，還考慮了風險因素在內。
美股道指昨日微升２點，升到１３５５１點的水平，主要是能源股因油價衝上９６美元而上升，但消費股和金融股就疲弱。在香港放假期間，道指由１３４５０點升上１３５５１點，累計升１０１點，對今日港股應有支持。
連續講了多天投資組合的問題，有網友問自己平常炒作盤與投資組合有何關係。我過去都講過，一個人有部份股份是投資，部份股份是投機，好一間公司有兩個部門，一個投資部，一個投機部，你可以長期同時營運兩個部門，看那一個表現更好，慢慢就知道自己適合投機還是投資。
如果你資金足夠，當然也可以長期營運投資部和投機部，若然資金有限，就只能減少一點平日炒炒吓的資金（投機部的資金），把它放入投資部，試一試投資的效果。
設立一個投資部，希望它一年有１５％的回報，這絕對不是太保守了，如果能長期維持這個戰果，５年資金就可以翻一倍，都幾厲害了。要長期維持這個增長不易，在大圍股市下跌的年頭，要維持這個戰果，就更難上加難。
Jack D. Schwager 在《The New Market Wizard》中，有一篇訪問索羅斯繼承人Stanley Druckenmiller，問他如何可以保持長期高回報，Druckenmiller話索羅斯有一個投資哲學，他也同樣遵從，就是投資要有長線高回報，第一要保存本金，第二要抵壘（即打捧球跑回本壘，在這裏的意思是「賺到盡」）。關於保存本金，Druckenmiller話好多人輸錢唔想走，他就認為市場一變，若對自己的投資不利，要馬上走，認輸平倉係最好的方法，９０年初他曾睇好德國馬克，但後來發覺市場有異，當時美國正在打伊拉克，突然傳出候賽因將在地面戰開始前投降，這種消息本可令美元大跌（因為美元原本因打仗而大升），但結果美元兌馬克只是微跌，
用他的術語是 I smelled a rat（我聞到味），他就把自己的馬克好倉平掉。
用香港的例子，１２月初有兩日港股衝近３００００點，但兩日都係差幾十點到唔到，這兩日都是在美股大升的前題下升唔上，用Druckenmiller的話就是smell a rat，市場有異，好友都要走。道理是唔對路就閃，唔輸或少輸就當贏。這種道理對投機者最重要。
Druckenmiller第二個則是「抵壘」，這個原則對投機者和投資者同時啱用，好多時散戶炒炒吓的心態是賺少少就走，贏得唔夠盡，其實贏時要盡量揸長少少，贏到盡，當然，你揸著上落股，當然要睇位走，但你買入成長股，若果咁好彩，買中低位，捱過後開始上升，就唔好咁快走，要賺盡啲，好天搵埋落兩柴。唔好以為索羅斯和Druckenmiller是大炒家，佢地營運巨型的對沖基金，炒作講求策略，同散戶炒炒吓的心理絕對唔同，佢地睇嘢相當長線。
陸羽仁認為，學投資比學投機易，炒股表面容易，但全部和高手對賭，散戶炒炒吓，朝生暮死，如果大市好似今年９月、１０月咁牛，兩個月升７０００點、８０００點，所有盲炒者都賺大錢，就自然覺得自己天下無敵。但大市回吐，散戶就好易被套住，即使後來炒番上去，細股完全唔郁，紅色股亦唔係隻隻大升，炒窩輪就更易死，一個浪就可以把散戶一年賺的錢打掉，甚至輸突。
所以我建議大家搵少少錢建立一個投資部，唔駛完全唔炒股，只係要學吓部份錢作投資，對投資部的回報有一個清淅的概念，要知道想要有多少回報，才決定可接受多大風險。大家要記往，設立組合和盲炒最大的分別，不在於回報，而在於風險管理，市旺時盲炒的回報更大，但完全不能控制風險。設立投資組合，如訂立１５％回報，這種回報肯定比盲炒低（起碼在市旺的一段時間內），但比較可控制風險。美股未到年尾都頂唔順，道指大跌１９２點，跌幅１．４％，主要係憂累經濟衰退，美國耐用品１１月銷售只有０．１％增長，比預期的２％少，加上分析員又估花旗會減少４０％派息，失業率又增加，搞到美股碌地沙。
昨日港股已經腳軟，但跌得唔多，睇吓今日點，跌得多啲先至係正常，跌得唔多就未必係好預兆，因為今日期指結算，跌得唔多可能係好友頂住，等結算完再跌。無論如何，恐怕這一浪反彈已經完結，高位約在２８３００點，要先回吓，等到１月下旬美國有眉目減息，先再有得大炒。
講到組合問題，網友myself做了一個總結，我希望大家都各自做吓總結，睇吓自己邊瓣精。Myself咁話： 「小弟都想藉呢個開開心心既聖誕節，多謝陸sir，俾好多啟發，令小弟投資投機更清晰，知多的自己做緊咩，同埋可以好貼市咁，知道一個高手係點樣睇股市的起起跌跌，分析問題，獲益良多。
「07年投資倉，表現尚可，超過15%，主力只有3隻股票，04年持有至今年，恆生(011)[股價及相關新聞] [股價及相關新聞] 和中石油(857)[股價及相關新聞] [股價及相關新聞] 令小弟喜出望外，HSBC(0005)[股價及相關新聞] 就有點失望，中石油今年跟林sir同巴sir走左，恆生最近亦已在$160沽出，希望游下水低十幾%可以再買，HSBC已提出轉左自己名，每年收息當債券，即使上反$152都唔會沽。
「投機倉得啖笑，5萬蚊本，全年做左20個trade，即出入40次，咩都買過，大股小股同新股，不能盡錄，好笑原因係以為自己賺好多，計完先知，只賺$5,000大元(10%)！好無奈咁講左句：『唓！咁辛苦得咁少！？』，20個trade，15個係賺，只有5個蝕，以次數計係賺多輸少，但以銀碼計就倒轉，最多個次賺$4,000，其他零零碎碎，最少個次只賺$200，致命傷係一次蝕$8,000，另一次蝕$3,000，『嬴粒糖輸間廠』仍然係小弟既頭號殺手，越係有信心的投機，越不想止蝕，就輸得越多。
「07年，體現在小弟身上的是，投資輕鬆、低風險、高回報；投機辛苦、高風險，低回報。
「小弟投資買HSBC、恆生、中石油，人家$100買恆生，當佢高息債卷，風險高得去邊？因為有信心，所有把大部分錢都投入去，平日都唔使貼市去睇到實，好輕鬆，回報亦很好，睇下隻恆生，竟然可以幾個月$100升上$160，中石油04年至今，回報更以倍計，有幾多炒股可以做到？不過，07年投資倉賺到錢，有超過一半的成份都是：『盲毛遇著大升市』，如果小弟係咁叻，就唔會06年恆指18,000就開始減持，好彩既係冇清倉，否則就錯過今年大升市。
「至於投機，一方面要好貼市，跟消息，如果冇興趣都幾辛苦，有時大市升隻衰野又唔升，又成日要諗換馬、止蝕、止賺，大股東又增持又減持，揸住把間尺找支持阻力位，印象中好似成日有斬獲，原來蝕一次大，已經等於賺幾次細。另外，投機冇信心，怕輸錢，每次投入的金額都好少，例如抽新股，以百分比升幅驚人，但錢碼計賺好少，對整個組合幫助有限，所以回報低，但就付出不少時間要睇到實。所以08年，小弟希望加強自己投資方面的力度，減少投機。」
陸羽仁觀察Myself的倉位及其回應，有幾個總結：
第一，他不是一個投機者，一年只做２０次投機交易，投機極都有限，真係鐘意投機的人，可能一星期也不止２０次交易。不過如果維持咁o既成績，賺賺蝕蝕，做多１００次交易，唔等如有１０％回報的５倍，可能同樣只有１０％回報，因為賺咗又會蝕番出去，得個做字。
第二，他不是最叻的投機者，也不是最差的投機者。只看他的１０％投機回報，就可以有上述總結，對最叻的投機者來說，２００７年是個豐收年，咁大上落，對炒上炒落的投機者而言（不是單邊只炒上），係大好的搵食機會。但一般普羅的投機者散，好多會比Myself慘很多，你買了細價股，買那些中國XX，或者乜乜礦業，由仙股炒上，唔識得走，跟著插到地底，如今就中哂伏，唔止蝕隨時唔見六、七成本金。即使炒紅色股，如果高追都要坐艇，如果炒認購窩輪就更傷。所以１０％投機回報，比上不足，比下有餘，比好多在銀行天天炒的老散好了。
第三，狂炒老散曾經大賺。今年某些日子，狂炒老散曾經賺大錢，記得在９月、１０月的日子嗎？恒指最後升上３１９００點時，我話酒酙得太快會瀉時，也是散戶投機者最賺錢的時候，那時如果我貼Myself這篇文章出來，恐怕還會被人罵。我今天這樣講，並不是想取笑炒得勁輸咗錢的散戶，而是希望大家經一事長一智，今年１０月的一炒，是外資大戶看到北水湧入狂炒港股直通車，順勢送你上路的一著，正如我當日所講，如果維持兩個月升１萬點的升勢，不用升到年底就可以升到４萬點，跟著便可以爆煲了。所以散戶可以炒股，但要保持一點清醒，一點理智，一點就夠了，曉得在股市顛狂時放一半貨，就可以救自己出生天。
第四，選自己合適的方法買股票。自己投機得，不妨多投機；如果投機唔係咁叻，撥多點錢投資，只保留少部份錢投機過手癮就可以了。若全個倉都去投機，若非高手，很難長久成功。
