昨日港股受歐洲股市拖累下跌，結果英國股市收市跌１．８％，隻北石銀行都跌三成幾，英國金融市場仍然樣衰，不過美股都幾硬淨，害死英國後自己唔郁，美股道指只係微跌３９點，牛皮等減息，睇吓港股又可否頂番住。好多朋友無論做人和買股都好亂，目標不清，左右飄移，咁樣做一世都上唔到岸，今日可以講吓控制個人理財和投資的基本心法，網友小潘提到把自己當作一間公司咁經營，我過去都用過此方法，所以不妨講講。
小潘叫阿K唔好炒炒吓時咁講：「唔知你有冇當自己係一間上市公司咁經營?我就會每年定下一個目標，呢個目標係用以往賺既錢作為基本，我唔貪心，可能會set 10- 20%增長目標，有本事就set高一d。呢個增長目標，包括透過節流(雖然辛苦d，不過幾有用)，搵多d兼職，工作上努力，博年中花紅以及投資。每一方面都要做到，不可以過份依賴某一方面收入來源。其實，長遠最後係做到靠投資既錢退休，不過希望是 50歲後能做到，一d都唔貪心掛。
之後，每3個月檢討一次進度(如果投資及收入不是很多，可以半年至檢討一次)，你會知道自己係唔係達標，而增加或保持增加收入既各種方法。(上次因為3個月都冇計數，於是就買錯交行, 沽錯MTR，衰心急)。」陸羽仁後生時也用過這個方法，我是一個開支永遠追不上收入的人（這是孤寒的代名詞），有一陣子見戶口的錢不斷增加，唔知自己用幾多錢一個月，就專門每次去提款時都記低，月底對數，計出一個月要用多少錢，然後計出每月儲蓄多少（收入減開支）。
講理財，首先要講收入和支出的管理，把自己當作一間公司，要成為賺到錢的好公司，就要盈利快速增長，方法不外乎是「增加收入，控制支出」（如果不是減少支出的話），好多後生仔開支大過收入，這種是蝕錢公司，靠借貸渡日，水源一斷，立刻玩完，美國佬係典型，無論佢哋賺幾多錢都好，消費永遠大過收入，最近次按風潮起，華爾街開始炒人，好多人做到投資銀行部門主管，住大屋開靚車，一俾人炒三個月內搵唔番工就跌入地獄，因為平時使大哂，住啲屋永遠超乎自己負擔能力，靠未來可能增加的收入來頂，樓價升咗就加按去旅行，有個中環茶友話我聽，一年前佢參加一個加勒比海豪華郵輪之旅，同船差不多有一半美國客話俾佢知，他們是加按物業攞錢去旅行，使咗先至算，所以次按在美國爆起上來咁大鑊，美國人無論窮或富，都無holding power（持貨力），因為借到突哂。
講完開支大，就要講收入少，我經常講，以後生仔計，自己的事業就是人生的最大投資，若事業做得好，可以產生好穩定而大量的正回報，而且會不斷增加，就算你完全唔識投資，但事業做得好好，都可以致富，這就是最傳統的發達方法，個個阿媽都會咁教仔，你乖乖地讀好書，入大學，做乜師物師就得o架啦，陸羽仁阿媽的年代要求更低，求其搵到份「寫字樓工」，有得涼泠氣開工，已經好好啦。咁o既觀念雖然陳舊，但有其道理，做好自己份工，就是人生最大投資。如果你係後生仔，做多份兼職，都可以增加收入，唔一定要靠哂投資。
好啦，點都講吓投資，投資得好，可以增加收入，收入甚至高過你o既本業，若出現咁o既情況，好多後生仔會想轉行全職做投資，覺得搵到食，甚至可以發大達，咁o既路似易實難，因為收入好可能因為個市好，不是自己特別叻，但股市不可能長期係咁升，到走勢逆轉向下炒兼靜過鬼時，全職炒股也不易搵食。後生仔頭幾年好重要，頭五年做得好，在行業內已可拔尖，你大學畢業去咗全職炒股幾年，若無所成，想返番本業唔係咁易，等如跑步讓賽，人地跑咗半個圈，你先至走入去再跑一樣，好難追上。
我覺得在一般情況，特別係後生仔，投資只是配菜，不是主菜，但你食呢味配菜，都要講究策略，最基本的策略，係你嗰間「 X記控投有限公司」究竟是藍籌，還是五、六線公司，究竟要穩陣，還是要博命呢？（明天續談）聯儲局局長伯南克大力減息救市，揸往成手股、成手樓的美國人拍手讚好之後，慢慢就會發覺好大鑊，因為往後美元轉弱，跟住通脹又來，美國隨時會出現一個停滯脹漲的衰退局面。
美元兌主要貨幣都下跌，歐元升穿１．４大關，黃金抽升，最新報７３４美元，同樣升穿了７３０這個主要關口，美股道指收市微跌跌４８點，港股仲有購買力，不過而家唔調整，小心下周結算前回吐。我們面對這種世界金融劇變的格局，好易無所適從。我叫大家當自己係一間公司，再定投資策略，但最基本的策略，唔係要估啱市況走勢，而係你嗰間「 X記控投有限公司」究竟係屬於藍籌還是二、三線，要穩陣，還是要博命呢？大家以為買股最怕睇錯市，陸羽仁就話投資策略錯配更大鑊，乜嘢叫做錯配，就是你以為自己係「投資的我」，但實際上郤天天做「投機的我」之事，就叫做錯配，錯配加上睇錯市，就可以把你送上絕路；睇錯市但無錯配，唔會死得去。
舉一個例，你話你自己係投資者，唔想投機，但你走去買港交所的窩輪，窩輪是衍生工具，是槓桿很大的產品，買窩輪實際是投機行為，再誇張點講，你本來無錢，見個市咁好，見李四叔話大市長升長有，會見三萬點，心諗市旺港交所實掂，之前無入市，而家好後悔，自己又無乜錢，不如用信用咭透支，攞啲錢去買港交所窩輪啦。經過借錢、買輪兩部曲，投機味重到唔重，但好多人還會稱之為「投資」。
投資揸長線，投機快來快去，投資平價買股計啱數可以唔止蝕，投機一定要止蝕，你用投資心態去買港交所窩輪，諗住長揸，以為政府會不斷增持，或者一跌就會入市，咁就死得啦。港交所升到３００元都唔奇，但跌番落１００元樓下亦有機會，買認購輪後，若正股低過行使價，一到期就變廢紙，渣都無，若果你借錢買輪，就會欠下週身債，呢種叫做輸上身。你可能唔會借十幾萬過大海入賭場，但可以借十幾萬去炒輪，其實又有什麼分別呢？
所以首先要搞正自己的心態，諗清楚自己想做乜，自己問公司想慢慢做大，還是想一夜擴張，想慢慢做大的公司，壞處是慢，有時睇住人一朝發達，好唔開心，但好處是風險較細。一夜擴張的公司，壞處是風險高，１元博２元，２元博４元，一直博下去，博到會發達，也可能一舖打回原型。好像占士甸和人鬥揸跑車衝向懸崖，距離崖邊最近者勝，既考技術、膽量，亦考EQ，誰可以在高峰時離場，萬中無一。李四叔在２３０００點時睇２５０００點，到２５０００點時睇３００００點，若果有幸到３００００點，佢又可以睇３５０００點，一站比一站風光好，問題是誰可以在爆煲前落車呢？
人有好多個面，可以是正職打工做乖仔乖女，同時可以兼職投資，甚至兼職炒作，公司也可以有好多種業務，可以係搞實業公司，可以係投資公司，也可以係投機公司，當然可以幾種事情一齊做，但都會有一個主要方向，到底你間公司，係投資公司還是投機公司呢？千萬不要以為陸羽仁抗拒投機，我只係抗拒唔職投機的人去投機，又或者抗拒唔知自己投機的人去投機。我甚至有少少喜歡投機，鐘意做生意的人，往往要冒風險，看到機會，瞓身一博，以小博大，好多時都和投機類似。
上次講到後生仔最主要的投資是投資自己的事業，惹起部份以投機為事業的網友反彈。這裏不妨講講以投機為事業的考慮。當你自願或被逼要全職炒股時，自自然然會成為投機者，因為一般人無咁大本金可以全職投資，靠幾個巴仙回報就可以養活自己，你等如被逼上梁山，天天要炒。當投機成為一種事業，一盤生意，又會還原基本步，要諗點樣可以做到這盤生意經常賺錢，甚至穩定賺錢。投機變成事業後，第一步追求的目標，做到輸少贏多，從而穩定賺錢，個個月埋單計數，都有正盈餘，否則你三更窮五更富，連輸幾個月，好快就頂唔順要執笠，即係唔可以再靠炒作為職業。
有些外資大行，會在行內吸納炒作人員，例如發現本土證券行有出色經紀，就問佢地想唔想轉做全職炒作者，願意轉行者，大行會打本俾那些人去炒，初期幾百萬，無人工，有得賺分成，做得好就會不斷加本錢，大行唔會理那些人用什麼方法炒，總之賺錢就得啦；唔好以為這種職業好正，雖然有人打本俾你去賭，這是嚴厲的淘汱賽，炒得唔好，三兩個月就出局，留得低的人都有一套炒作心法，經得起時間考驗。大行就咁養住一班專業炒家，這批人又和大行自己的公司炒作盤分開運作。所以你想全職炒股，甚至兼職炒股，要先搵到一套方法，這套方法還要經得起時間和不同市況的考驗，而家市旺，你敢盲目做好，多數得，但遇上大跌市又如何？市淡時又如何？若股市大跌後，可能靜一兩年，成交少，股價唔郁，你要諗到方法搵食。全職炒作者會「發明」很多方法，有人追成交，做了電腦軟件，一見股票成交暴升就追入；有人炒業績，找經常公布好業績的公司，在公布前一個星期入，若升了在公布前一天就沽清；有人專炒期權，市旺做揸家，市淡做沽家。
總之「X記投機控股公司」的炒作方法可以多種多樣，並無成法，但問題只有一個，你的方法賺唔賺到錢，要長期穩定有錢賺，唔係今日賺，聽日蝕。你細心一想，就知道做投資者在平價時買入好股長揸，比做投機者容易得多，唔怕得罪講句，如果無方法就去投機，以後生仔炒炒吓的心態去全職投機，放長雙眼睇佢地三幾年，真係死十個當五雙o架咋。反過來說，如果能生存下來，穩定賺番三幾萬銀一個月，已是百中選一的強者了。美股上週五繼續上，道指升５３點，衝向１４０００點高位，有少少做雙頂之勢，若下月再減息，隨時有假穿雙頂的可能，但美國樓市危機難解，中線不能過份看好美股，美國出現經濟差，股市升的怪象。
上星期講起要把自己看成一盤生意，要有長期有盈利，把公司做大，唔好做一間成日蝕本的公司，還要把僅餘的錢胡亂投機。今日再講營運公司的目標。千祈唔好以為定目標好容易，大部份人都無好認真咁為自己這間公司定好目標，只係模模糊糊咁有個想發達的念頭，想做李超人，做李四叔，又唔知點樣可以做得到，唔知點解就在炒作股票，以為這是帶領你發達的捷徑。
想發達唔緊要，要定好目標，計吓數，睇吓點樣可以發達，唔係漫無目地炒作就可以發達。陸羽仁問你一個簡單問題，全香港有１００萬人有買股票，活躍炒作的有３０、４０萬，如果個個都發達（以有１０００萬淨資產為發達的定義），香港過１０年、８年隨時勁過美國，你話會唔會？但在股市泡沫高漲時，股民好易有一個發達的感覺，因為股市一天天在澎漲，這一刻所有買了藍籌股的人，感覺上都賺了錢，但一日未沽出，這只是帳面財富，只有真係有一賣一買，財富才實質轉移，所以一日未沽貨，一日只是心理作用，當然太早沽了貨，泡沫還在成長中，股價將來更貴，沽了貨的人感覺是蝕了，至於一年之後誰賺誰蝕，現在就說不清了。
再講番為自己定目標，你想發達，也不妨設定發達的目標，就以搵到１０００萬為例，計吓數，要快，當然要全數投機，假設你有本金１０萬，想５年內搵到１０００萬，你試一年、兩年，如果仲未炒到有２００萬、３００萬，相信你都唔使諗啦，大部份人好快會發現，想炒股變富翁，只係空想。快的方法不成，搵慢一點的方法，記得我講過７２律（以投資回報率數字去除７２，就知道投資要翻一翻所需的時間），若年回報１０％，７年多一點就翻一翻，如果你而家有１００萬儲蓄，７年後變２００萬，１４年後變４００萬，２１年後變８００萬，都好近目標了。如果年回報高一點，速度就快一點。總之２０年後有１０００萬身家，個心都會定啲啩。用這種慢方法，首先要問怎樣有１００萬本金，然後問如何以有穩定的年增長１０％，不會中途輸錢，蝕掉本金。
用快方法幾年搵到１０００萬的人，百中無一，用慢方法花２０年搵到１０００萬，百中有十個以上，前者夠精彩，後者相對穩陣，目標和方法，你可以自己揀，亦可以先試試快方法是否成功，若花一兩年發覺自己不是炒作好快發大達的材料，行唔到快線，都最好轉軚行慢線啦，唔係最怕揸任架法拉利碌落山坡渣都無。大家聽落就會發現，我這種講法，與是否全職炒股，一點關係都無，全職炒股可以好博命，亦可以好穩陣，我主要針對又後生，又全職炒，又搵命博的朋友，生命無Take two呀。
講番累積致富，最近有個老友送女到英國讀中六，我好搞笑咁對個朋友講，２年預科加３年大學，共要５年，英國學費貴到驚人，每年５０萬都唔夠，５年共要３００萬，又用７２律計，若投資年回報１０％，３００萬７年變６００萬，１４年變１２００萬，我對朋友話，希望你個女讀得成書，將來有成就，否則你唔花錢俾佢讀書，１４年後送１２００萬俾佢，對佢o既人生幫助更大！若佢讀書唔成，浪費了幾年，回來搵唔到好工，一世人都搵唔到１２００萬o架！老友當然媽我媽到七彩，話我市儈。無論如何，這個故事教訓我們，兒女教育是很大的投資（或者係開支），另一方面，識得投資，有穩定的回報，可能比接受專上教育，更令你一生受用不盡。
網友Altai和牆頭草都是全職炒股者，從他們的回應看，他們的思想十分成熟，而且都是慢慢摸出一條道路，他們視全職炒作是一盤生意，一種職業，並不是發達捷徑，但剛離開學校年青人，若一畢業就全職炒，心態就不一樣，年青人入世未深（唔好意思我要用這種老嘢的口吻講話，但這確實是我的感覺），特別是做事的經驗少，對世情了解太少，炒股只憑直覺，要成功絕唔容易。美股道指又升９９點，睇嚟今日期指高位結算無走雞，股市愈升愈高，散戶唔信又升，唔信又再升，升到你信為止。好多人話１０月有股災，如果好多散戶相信如此，買股窒住窒住，恐怕又唔係災得咁易，等你以為無災先至急跌都未遲。
講番點樣搞好自己間「公司」，首先要有本金，無１０萬、８萬本金，較難開始有系統的投資，至於這１０萬、８萬點樣弄回來，當然唔係叫你去借，最好就是從工作收入儲回來。如果工作做得好，恒常有比較大的正現金流流入（即收入減開支還是較大的正數），你呢間投資公司的股本就會不斷擴充。好了，有了本金，開始投資，首先要設定你的目標，要選擇高速增長，抑或穩定增長。選高速增長，好處是快，壞處是風險高，可以發達，也可以清袋，只宜較年青者選擇，試想你３０、４０歲好辛苦投資加儲蓄搵到２００、３００萬，想用呢筆錢供條化骨龍去外國讀書，或者靠筆錢將來退休養老，你一晚輸清，頂唔頂得順先？若你選擇穩定增長，好處是穩，壞處是慢，在平靜的股市，所有東西都增長得慢，穩健的壞處不明顯，在速動的股市，好多股份都飛快上升，做穩健的投資就顯得很笨，這就是愈來愈多人想放棄匯豐（０００５）的原因。
好多人本來從不去想自己的投資目標，只是隨波逐流，事實上好多應該穩陣、或主觀上只想作穩陣投資的人，走了去做高風險的投資，結果就要付出代價，買電盈（０００８）就是好例子，即使一直有買香港電訊的股民，見到李澤楷入主把電盈變成炒股後，若性好穩健，就應該走避，唔識走就遭秧。又例如以如今的市況，買港交所（０３８８）就一定不能當穩健的投資了。但如果我強逼你去想清楚投資目標，我估大部份人都唔會選兩個極端，而會話自己係中間派，唔使太穩陣，但又唔想太冒險。呢個答案最易答，問題唔知點去執行，但大部份人其實無執行，只係隨意咁去做。
用一個實例去講吓，網友亞K早幾日有此留言：「 陸ＳＩＲ，“亞Ｋ記控股公司”,勉強都算是一間做乜師物師, 若論本業,都可說是一門穩陣，年年有錢賺的生意,但無奈花費太多,扣除供樓，供養父母，基本消費（之前太大使），交稅，令本金太小． 經過一年炒炒賣賣, 要蝕本，是時間從新檢討業務，可否談談，像我這些高不成低不就的，拉車邊中產，除了減省消費，應怎去投資變成一間藍籌呢，因為印像中在９７股災死得最慘的就是這類人，若大跌市會否也是番版呢?」從阿K的留言，會見到她有不俗收入，對股票有一定分析能力，但買股票的手法經常在彎角飄移，浮游在投資與炒作之間，這就是問題的關鍵。
理清目標好重要，假如你設定自己是一間中度風險公司，市靜時組合目標年回報８至１０％，市旺時１５至２０％，但關鍵想保住不輸錢，希望年年有正回報。你可以把資金分成兩份，投資的部份不少於５０％，投機的部份不多於５０％。投資部份是資本遊戲，當投資回報不高於１０％時，只能靠增大資本，實質上才可以有高點回報，１０萬元１年回報１萬，２０萬元１年回報就有２萬，資本多回報才多。投資部份首要穩陣，要唔輸，少冒風險，最好少進出，投資買大股，大公司一年一次、兩次的業績期，通常就係只升一轉，升幾個巴仙就收工。
投機部份不太講究本金，考眼光，捉時機，快人半步，難免要進出，要有合理心態去投機，不要抱「唔認」的心態去投機，咁樣仲弊，鬼鬼祟祟，應炒唔炒，蘇州過後才去追，好易高追衰收尾。所以我給阿K開的藥方是鼓勵她去投機，而不是成日話唔做老鼠，但鼠癮難除，做老鼠唔係壞事，問題是你識唔識做。但投機要限注，正常可用３幾成資金去投機（咁高的市況用１至２成資金就夠了），要輸得起，講得投機，就要預這筆錢可以輸清，若頂唔順，再減些注碼。比較自己公司投資部門和投機部門的業績，旺市一定係投機部門好，但要看它抵禦跌市的能力。反過來旺市亦是考驗投資部門的時候，旺市也不能有太差的投資業績，過早離場，成手現金，就增加最後忍唔住在市頂重新入市的風險，投資部門如何使用閒置現金，做點安全的區間交易，可是很高的學問。
假設你間公司年頭設定投資部門回報８％，投機部門回報３０％，年尾就要看看能否做到，有時做不到和大市有關，另一個比較基準是和股市同類股份回報比較，看自己會否跑輸大市。目標不是訂得愈高愈好，目標要和自己的風險胃納相適應。如果要參加股神遊戲，就要把所有本金投放在最高風險的類別，例如狂買窩輪，目標係贏幾倍，若果睇錯輸清虛擬本金，亦無所謂，但在現實的人生裏，你能忍受投機部門輸清本金嗎？若果不能，就要想辦法控制風險了。若你間公司投資和投機部門年年有１５％以上的綜合回報，人生可以無憂，但現實裏不易做到，如今這樣喪升的股市，是變態而非常態。或者好多人盲中中過去兩三年可以做到高回報，要一二十年長期如此，殊非易事，記住股神巴菲特的巴郡，也只有２０％左右的年回報而矣。又過了期指結算日，正常來說，在月頭的十日，股市會較平靜，大戶會在月中才發功，推動股市向一個方向發展，不過近日股市都唔太正常，所以唔知可唔可以用正常方式猜度之。
在牛氣沖天的股市，有好多新仔入場，犯上各式各樣新仔的毛病，例如網友佐助的自白，也可以看到新手的無奈，佢咁樣講：「我是新仔,我今年二月尾才開始買股票，好不幸遇上三月五號既恆指大跌市七百七十七點，當時我忍痛將股票全cut loss了，有一段時間唔敢再入股玩，但後來起五月尾六月頭，我又再嘗試起股海找一點點o既利潤，起初都唔錯架 每日低買高賣，一兩日內出貨，真係眼前o既利潤都幾好，十幾萬既本錢，很快我就搵到幾萬蚊。「但大家仲記唔記得八月十七日o既大跌市?我眼見我自己手上o既股票,幾日就差唔多跌左三分之一，果時真係好擔心 因為記得人地話真正o既大跌市是會無左三分之二，我唔想連本錢都無埋，所以又再起deep V最底cut loss了，這次對我嚟講好傷，我早前贏了o既全部都無埋，同埋lost了大約三萬幾蚊 好唔開心呀!!!
「幸好有幸發現左呢個Blog，每日睇陸sir你無私既教導同埋一班網友o既分享，我仲一口氣就睇完陸sir你果兩本書 得益不少呢。我知道咗咩係價值投資，知道自己一直都係投機，我依家想將資金投入去0005(匯豐) and 2823(A50基金)我想長hold，但0005依家入市係唔係好唔理智呢??定等跌市先入市好呢?現家2823又好貴呀!!!!但又見到恆指日日都創新高，我又好似唔入就會失去好多找錢既機會 ><"陸sir,你認為我應該全hold cash等大跌市先入好，定依家就開始入會好呢?我o既十餘萬係老本，無咩用途，之前係放起銀行收利息o既，希望陸可以覆我啦!!! thz a lot!!! 」
睇完佐助的自白，發現他都算是幾典型新仔，有幾個特徵：
第一，過去投資趨向保守，只把錢放在銀行收息，以往只是一間極保守公司。
第二，一開始入市就不知不覺成為投機者，開咗間投機公司而不自知。既然開咗投機公司都唔知，自然不懂得投機的策略，犯上「嬴粒糖，輸間廠」的毛病，在中等速度的升市，出出入入，炒股唔識坐，賺錢不多。但跌落來不識一成止蝕，要在調整市跌三成時才止蝕，被逼在deep V之底斬倉。
第三，表面看如果他當日輸三成都唔止蝕，等到今日會幾發。不過若果係唔覺意開咗間投機公司，又唔識死永遠唔止蝕，最後一跌到來時，就會一舖清袋。所以佐助怕死在８月１７日止蝕，看來很笨，但無有怕永不止蝕的人，長線更笨，狂炒而能贏到尾者，萬中無一。
第四，想由投機公司轉番做投資公司，現在似乎太遲，因為在這種大牛市中，便宜貨相當有限，A50基金現價２４８元，距離年多前陸羽仁第一次叫人買時的５０元，已升到近５倍，或者再可以再升到３００元、４００元都講唔定，但跌起上來亦會幾慘，可以炒而不可以投資。現在的市況，狂炒容易投資難，投資公司要先練吓忍功為尚。唔係無好股，但係佢地唔會升，你買咗都好似無買一樣。
新仔炒股，註定要交學費，在這種狂升市中，最後恐怕新仔要交很昻貴的學費，才知道股市是什麼一回事。股市是財富轉移之地，富可敵國的金融巨企，一次又一次地在人為的股市波浪中，把財富轉移，吸乾市場的資金，一批又一批的股壇新仔，就如登陸諾曼第的士兵，在無情炮火中犧牲。講多兩句，股市升得咁急，如今已進入速動的升市，快上快落，如果要開投機部去炒，只能快來快去，做吓一日鮮兩日鮮，如果贏到粒大糖，股價一回頭就要走，唔好長期坐貨，和升市初期的要坐吓貨的投機手法相反。你可能會問，咁樣短炒未必賺到錢，我會話咁樣就考你功力了，如果你間公司開咗投機部試過都賺唔到錢，咪停咗佢唔俾佢運作囉；若果賺到錢，咪俾佢細細地玩吓囉；搞公司好簡單，賺錢的部門可以繼續，唔賺錢的部門要摺埋。要抱著跌市隨時到來的心理，才可以入市投機。美股道指上日升１９１點，升到１４０８７點，破１４０００點大關，日股開市升１％以上，港股料可高開，再來玩急升。
股市升穿２７０００點後，「投機的我」搵食無在低位咁易，所以我提醒大家要小心，上週五牛腩貓咪有個問題，值得參詳，佢問：「 陸sir, 早晨! 我不明白你篇文中最後一段『如今已進入速動的升市，快上快落，如果要開投機部去炒，只能快來快去，做吓一日鮮兩日鮮，如果贏到粒大糖，股價一回頭就要走，唔好長期坐貨，和升市初期的要坐吓貨的投機手法相反。你可能會問，咁樣短炒未必賺到錢，我會話咁樣就考你功力了，如果你間公司開咗投機部試過都賺唔到錢，咪停咗佢唔俾佢運作囉』牛腩問「為何要讓新手的投機部要用即日鮮的方法用呢?
1.我看了好幾本投機書籍, 內容都是訪問交易員(投機人仕)成功的心得. 各人有自己的方法, 但使用搶帽子(差額利潤投機行為)成功的例子, 少得可憐.
2. 科斯托蘭尼先生形容用大額金錢, 賺小利這類人仕為"證券玩家". 為何要先嘗試最困難的技機方法?
3. 為何要做猶豫的投資者?是否要新手嘗試貪婪和恐懼感?
JACK D. SCHWAGER提過:在交易所內可以賺錢的方法過千種. 不明, 好不明為何投機部要用最困難的方法? 是有其他用意嗎?」
牛腩貓咪的提問好有意思，我講這種近似的「證券玩家」的短炒心態，似乎是好多人講炒股的下策，有需要說明一下。
陸羽仁經常講，我寫文章給不同讀者看，炒股程度各有不同，有等如炒股幼稚園生、小學生、中學生、大學生，好難啱哂所有人睇，我傾向從眾，即針對最多人的類別，我估計股市咁熱，好多剛開始炒幾個月、一兩年的炒股中、小學生入市，所以上篇文那段話是講俾他們聽啲。舉一個例子易啲明，網友Rabbit話自有投資有投機，但上一浪跌落來，他的投機部門重創，他揸了三隻股，利記（０６３７）蝕一半，俊和（０７１１）２．４元入，唔見近三成，香港華人（０６５５）２．１９元入，唔見１３％，佢極之肉痛。其實他揸的股份已經唔算最雞嗰種，但跌落來唔識壯士斷臂，所以都幾入肉。一浪跌完落來大市再創新高，但上次炒的今次未必一定炒，如果你哋買的股票再雞啲，如果真是一個大浪殺到上唔番去，你估後果會點？
我上星期五寫那段文，有幾個用意：
第一，好多人唔炒唔舒服，但在這種市道，炒股唔好抱太長線的心態。
第二，炒股要嚴守紀律，好多人有好多原因唔守紀律，最常見原因是因為佢入市的心態係長線的（或者新仔分唔開長短線，以為自己係長線），所以見隻股跌過一成時，就會提出好多基本因素分析，容許自己放「紀律假期」，等一等，隻股就沉咗入深海。所以我提醒大家在不同市道用不同心態，而家要用更短線的心態。我只係怕新仔見個市係咁升，就變成「X記盲目控股公司」，買了任何喪升股見跌下來都死揸唔放，咁就大鑊了。
第三，如果你已是炒股大學生，咁就同平日無分別，你買一隻股，定一成止蝕，佢從無跌過此位，可以唔走。到隻股升咗上去，有兩三成利潤，你定了現價低一成的止賺位，不到不沽，隻股再升，你再推高止賺位，可以食盡利潤，亦和平日無分別，唔使轉做證券玩家，未到止蝕位、止賺位就離場。如果執行紀律是有效方法，升市跌市都啱用。
所以話做一日鮮、兩日鮮，主要是講俾那些新仔聽，我話「股價一回頭就走」，其實係叫新仔執行紀律，假設新仔甚至未識執行止蝕止賺紀律係乜冬冬，但會聽得明一日鮮、兩日鮮，即係話「一唔對路就走」，情願佢地走錯咗，賺少啲，都唔想佢地見到有災難都唔識走。有時股份初初跌時好衰，陰陰地回，唔覺意跌了一兩成，你唔識止蝕，跟著來個急插，夾埋無咗五、六成，就想沽都沽唔落手了。咁o既股市，日日升得咁高興，最後好多新仔會交學費o架。
今次呢個市，係十年一遇的大升市，上次係九七年的回歸升市，二０００年的科網股升市，都無呢次咁大力。
在美元大跌，股市太高的年代，好多朋友已沽貨套了現，有少少唔知買乜好的感覺。或許可以從Yy生Yy太的問題講起，佢地問：「我們收入供”君臨天下”是ok, 但買了”餘錢”這2年就不會太多(現居賣了可套多d現),寄望將來的收入上升及投資的生意回報增加。您說得對其實同買股一般要有好defined 的 strategy. 唔可以買左先算，初初想自己住，告訴自己是好投資，話唔定住幾年,升30%，見人d樓是貴買貴賣。
想想下供好貴, 不如租住比人先，同散户初哥買股一樣，7上8落。不過由第一次看到最近 2 星期西九計劃出左(前後6星期內)，發展商加了多次價足有15-20%，upside好像細好多.係2百幾3百萬差價! 好勁貴。想買都唔敢追，感到好唔抵，但的確有人接。現可能要找低水的其他選擇。其實我們想/會這2年換樓，想自己都enjoy下更好的居住地點/環境，(無純租比人的投資打算，因覺買股靈活好多)，從而住了，長線保值(因買股又不會用這麼大貢捍)。
而家是否等股票下跌，雨天才購樓呢?陸sir,您看股市雨天，樓市會不會同是雨天呢? 定如地產所講，97情況不再?!資金由股市流去樓市，大把人(及大陸人)有錢，唔多覺會回呢?陸sir 是否歷史不會簡單的重複? 經驗不足, 請指點一下。」 好多網友睇完之後，可能會覺得Yy生Yy太咁富貴，自己唔係嗰皮，其實佢地問的問題，同其他問題一理相通，大家不妨一起思考一下。我們可以分幾個層次去諗。
第一，升市的由來。這個股市上升的大浪，是綜合了美國經濟的弱勢和中國經濟起飛而成，資金由西向東流。中國由一窮二白變小康國家，在市場化的過程中，把大量壟斷性行業公司股份化，拿部份股票到市場發售，中移動（０９４１）、中石油（０８５７）、三大銀行、國壽（２６２８）都是好例子，由於要把大量股票賣出街，阿爺平賣資產益街坊，唔買就走寶，這些股票經過幾年培養，價值慢慢反映出來，再吸引西水東來，造就出買紅色股搵錢的機會。首先不理未來中短期有無跌市，國有化企業私有化的投資機會，過三幾年就會耗盡，有得買要把握。
第二，個人的能力。每個人有不同的能力，由於知識和性格的限制，每個人投資往績不同，我不斷講要將自己當成「X記控股公司」，量入為出，投資增產，把細公司做大，讀書叻固然好，讀書唔叻，投資好也是一技之長，有幸生在一個國際金融中心，有幸在國家經濟起飛時投資，成功機會已大大增加。但你要問自己一個問題，市場雖好，你的投資住績如何？若買股票投資住績好好，自然應該繼續買股，若買股住績麻麻地，是否可考慮轉為買樓投資？
第三，買樓強逼儲蓄。彼得林治講過，買樓是最好的投資，因為好多人其實唔識買股，但買樓比較容易，細屋換大屋，一間換一間，換得三幾間，就有豐厚財產（物業價值），仲賺埋十幾年的居住。買樓好處除了槓桿大（不過升同跌都咁甘），也不易出售，所以減少身痕升少少就沽貨的風險。陸羽仁加一句，美國人好大使，有錢會使哂，強逼自己供樓，等如強逼儲蓄減少消費，對美國人特別有效，你又係唔係呢類先使未來錢之人呢？
第四，買股急促增值。這句話只有這三幾年有效，過去香港經濟以地產為龍頭，股市龍頭也是地產股，股市多數超前樓市半年，股票升得幾升，資金就套出來轉去炒樓，樓市亦炒到飛起。但這一兩年無出現這個現象，主要資金留在股市，樓市主要豪宅有得大升，其他樓郁得唔多，炒唔起。其實樓市和股市的現象一理相通，因為股市不是香港內部因素帶動上升，只是紅色股帶起大市，而樓市亦只升大陸錢會買的豪宅，所以過去兩三年如果唔係買豪宅，買樓好易跑輸買股。
講咗咁耐，結論係乜？若果未來樓市好，股市唔會差，好難話出現大股災，樓市照樣好的狀態，所以唔好諗住股市太高，買豪宅避風，若果不幸打風，豪宅亦會中招（無大升的中小型樓另計）。若然無風，股市一樣好搵。新時代唔好記住舊經驗，未必行得通。要追逐急升的資產，就要追逐紅色錢的走向，股和樓都一樣，不過高追回報高，風險也高。
所以關鍵睇吓自己問公司的經營住績，若過去在股市搵到大錢，不一定要套股換樓。若過去投資住績麻麻，個人花錢又多，又不妨買間樓，強逼自己儲錢。分析樓市之前，分析自己更重要。至於樓市，豪宅和紅色股一樣，升咗咁多，會大上大落，急促發展的經濟，炒作味濃，波動好大，恐怕香港豪宅會跟紅色錢流而波動。至於無乜點升的中小型樓，特別近地鐵或樓齡新那些，就可以溫和睇好。
股市如坐過山車式的波動，狂升急回，早幾日每天升幾百點、１０００點，昨日單日高位回落１６００點以上，心臟弱少少都頂唔順，這種市況，拉闊少少看，雖然走勢轉弱，但一兩個月內升或跌３０００點等閒事，散戶要按紀律投機、投資。
昨天早上見升到匯豐（０００５），感覺不良，又見高盛出報告話睇匯豐見１６１元，連一直唔郁的大笨象都推介，而且大笨象又一度炒上１５０元樓上，心中不太舒服，人人話大市升係內地同胞放假無嘢做來香港買股，但他們無理由對步履緩慢的大笨象感興趣，頂高大象唔知想做乜。結論係的確有好多大陸客一舊舊錢拿來香港買股，但操控大局的不是內地同胞，而是外資大戶，問題是他們想以何種形式食糊。小心要跌也不一定一條直線咁跌，再抽高才跌都唔奇。大市咁波動，散戶好易不斷做錯事，你們的投機部門，小心「贏粒糖輸間廠」，有些典型值得講講。
典型一：
短炒變長揸。網友Angus問：「陸sir，請給我意見吧...真係好煩今次...群星(3868)[股價及相關新聞] 我喺它上市時，用AO $10.1的價錢入左6000股。但宜家賬面已經輸咗$10000，我買它其實只是想DAY TRADE。我留意左好幾隻新股，第一日收市價都係高過開市價eg恆鼎,遠洋。所以諗住好放心，一開市升幾亳子就走。而且因為中簽率低只有10%，應該會有人買貨。誰不知沽壓o甘大 ，開市後不久就係o甘跌。大戶唔係有禁售期的咩，點解會有o甘多貨沽出黎的呢?宜家沽又好唔甘心，怕隻股已經俾人沽到差唔多見底。但唔放又驚會繼續沉落去...我又唔知會唔會貨源歸邊，遲的會有機會升返上去喎，但我見買個的broker牌又唔係咩大行，so真的唔知可以點。」 Angus識得落AO盤，又話自己係炒即日鮮，證明係炒新股的慣匪，咁簡單的事情就唔使再來問我，你AO盤買入，當日一跌到一成止蝕價９．０９元，就應該立即斬倉，唔使等到佢而家只有８．４２元才去斬。你都識講，幾隻新股，恆鼎、遠洋AO盤買入都有升，問題只是呢隻唔升。我教你點營運你個投機部，要攞條大數，隻隻新股開市AO盤買，假設三隻升一隻跌，食三隻，輸一隻，只要夾埋都有賺就得啦，你呢個投機部門仲係得o既，若果你話唔係噃，食嗰三隻每隻食一兩個巴仙，輸要十個巴仙止蝕，賺埋唔夠蝕，我就話唔係止蝕唔啱，係你呢個AO盤炒新股的方法唔得。時至今日，你好似想把炒即日鮮的投機部變作投資部，咪傻啦，你話怕沽咗隻嘢升，無錯，無人話佢一定唔升，但請問幾時升呢？如果跌到６元之後才升，又或者牛皮半年才升，你又頂唔頂得順呢？問題是你在上市第一日無沽，唔係幾日後沽怕佢遲啲沽完再升。方法唔啱，輸多贏少，投機部門過一年半載都要摺埋啦。
典型二：
輸錢心有氣。網友時來風買咗利記(０６３７)，一直未止蝕，現在這樣講，「若果執行止蝕將(637)[股價及相關新聞] 立斬，它即反彈那便死得很慘，因它從第一日下跌就從未反彈過.每天還再很多人依然在低求貨,過兩天又止蝕,比我更風「瘋」,還希望鸁錢,我只係唔想在最低位把我的股份送給那個XX主席。」希望你唔介意我咁講，時來風提出的理由很怪，利記跌咗咁耐未彈過，你又點解覺得佢會彈，而且仲會彈到你「好慘」的高度？另外好多人博反彈，如佢哋買入後一成止蝕，又點會慘得過你？我唔係想窒時來風，只是覺得你心中有氣，影響分析。忘記了那個XX主席吧，要炒等機會搵個另一隻去炒好過。投機部門要泠血無情，對自己亦一樣。
最後講多句，大波動市，要嚴格執行止蝕的紀律，今天止蝕了，明天再炒過，唔係死守就可以防止被人震走，而係一到止蝕位就止蝕，睇定才上番車，又是一條漢了。
呢兩日股市回落，股壇老鼠四圍竄，其實大家睇睇自己投機部的業績，就知道自己做老鼠到唔到家。網友Steven羅有奇細個捉魚的故事，發人深省。佢咁講：「今天看完頭條日報的文章，令我記起生活一小事，希望和大家分享。小時候我常到水塘野餐。頑皮的我愛用蝴蝶網捉魚。起初很失敗，因小魚多都不敢游近岸邊，而且一見網影便立即逃掉。但我並無放棄，把麵包投到離岸稍遠，然後耐心地把更多麵包－步－步投近岸邊。到起綱時小魚己一團團的瘋狂圍着誘餌，每每總有收獲。還清楚記得－次，圍觀的看到熱鬧情景嘩言「這才是大鱷」！做「大鱷」的感覺真好哦。」股市熾熱，好多新股民入場，陸羽仁提醒大家要認清股場的本質，股場是大鱷吃魚毛之地。大鱷佈個局，將魚毛一網打盡，那種快感可以意會而不可以言傳。你盲中中入股場，好快就加入魚毛行列，唔覺意就俾人食埋，這裏不是兒童樂園，不是大戶散戶齊齊玩玩齊齊happy的地方。
我叫你地分開「投資的我」和「投機的我」，就是想話俾大家聽，你要投機，就係同大鱷對賭，其危險不問可知，唔好信一般的感覺，因為大鱷就係食住呢啲感覺，就等如Steve放入水塘的麵包，把你一步步引到他的網中。內幕消息就是這些麵包、目標價亦是麵包、短期走勢也是麵包，你大大啖咬落去，實聽遭秧。
你叫你將自己當做一間公司，就係想你去睇吓自己投資部和投機部的住績，成功的部門加大，失敗的部門縮細，以網友kym的個案為例，佢買股就不太成功。佢話「陸sir大大今期教人開投資部同投機部，話邊個唔得就刪邊個，咁如果兩個都唔妥又點算，係咪買etf好過？今年年頭到而家,我投資部跑輸大市，對上一個月投機部更剛好收平，拉勻慘過淨買2828，更加唔好講2823，o的佣就益晒銀行，連續兩年都係咁。人人都想做老闆，但現實係做生意的，失敗多過成功。個市咁旺都唔能夠好天收埋落雨柴，嚴冬時都唔知點。」Kym講得啱，咁旺o既市買股都唔成功，淡市、跌市唔知點算。Kym的問題是投資部和投機部都唔太成功。無論如何，Kym都有一樣嘢成功，就係有去檢討，至少知道自己唔成功，你唔好以為我講咗等如無講，好多人炒股幾十年，一路輸錢，但無去計，亦唔知自己唔成功。Kym有自知之明，都係一個好開始。投資比投機容易，建議睇完自己間公司業績發覺唔係好掂的網友，先減低投機炒作的比例，唔好成日炒，唔好成日出出入入，若自問唔識炒仍要炒，就申請吓新股，定好止蝕，輸極有個譜。擴大投資的比例，耐心等股市大幅回落時才去建倉，建倉之初要守一成止蝕，輸咗搵低啲位再建倉。若能在相對平的價位買入好股，就盡量長揸，希望長線有好點回報。股市風高浪急，投資切忌高追，短炒例外。搞好你間投資公司的業績，旺市淡市都做到年回報１０％以上，咁就可以長炒長有了。 美股道指又升１２０點，出現經濟唔好股市泡沫化的怪現象，今日曾特首公布施政報告，減稅有利房地產股，睇嚟港股會再炒一炒。我叫大家將自己當做一家公司，睇吓自己投機部和投資部的業績，唔好分析股市住，先分析自己，睇吓自己邊瓣做得好，成績好，然後決定住後去向，加大成績好的部份，控制成績差的部份。
網友Jessica 把她的持股和投資／投機的住績公開，問吓意見，想開始炒港交所o既認購輪，問大家好唔好。睇番Jessica的買賣股票成績，結果不俗，買股票大多是走短線，炒兩三個月就賣，不少都有１０幾、２０幾％回報，炒股成績不俗，基本屬鼠類動物。買中的股份多數係半新股和紅色股，比較敢在跌市中買貨，所以有斬獲。買錯的主要是細價炒作股，香港體檢（３９７）輸３４％，中國消防（８２０１）輸２６％，其餘兩隻大價股富豪信託（１８８１）和中芯（０９８１）雖然輸錢，但輸得唔多。佢好少做羊仔揸得長，唯一例外的是地鐵（００６６）和中行（３９８８），地鐵揸咗７年，賺１６４％，中行揸一年，賺４９％。另外一隻本來有機會揸長少少的大股中移動（０９４１），去年３月７０．６５元買入，但６月在８３．２元時已沽出，並無長揸。
Jessica這種揸兩三個月短炒的老鼠生活過得幾成功，和她的選股及買股時機有關。阿爺把龐大的經濟私有化，造就好多搵錢機會，其中一個就係新股上市，有時大股仲搵得多過細股，因為大股貨量大，要平啲上市，才容易去貨，民企或細股貨量少，所以上市價會貴啲。雖然Jessica捉唔到升得最勁者，也食唔盡升幅，但她比較敢在跌市入貨，所以搵到食。但要記住花無百日好，阿爺而家都開始無咁多好股大平賣，愈賣愈貴，搵食機會減少；如果可以維持一二十年股市咁好環境，Jessica 就可以變巴菲特嘞，因為巴菲特組合年均增長２０％左右，Jessica的組合肯定唔止咁多，問題是這種大牛市可以連續維持幾耐。
Jessica 好少長揸，但佢長揸地鐵和中行的住績不俗，可以慢慢學習長線投資策略。Jessica 炒股輸錢最多的都是細股雞股，以後記住炒這些雞股唔係咁易搵錢，要小心，要回憶一下是在什麼情境下買那兩隻雞股，點解佢哋可以令你輸咁多，以後要避開那些犯錯的行徑。Jessica過去無買窩輪，而家想炒港交所的認購輪，不外乎兩種心態，她慣咗在低位撈貨，個市唔跌，無乜平貨可撈，有錢無法投資。另外是呢一期興炒大股，好多師奶兵團都炒大股搵到食，Jessica想 買大股又嫌不易有兩三成升幅，自自然然想到買輪擴大賺價。
咁o既升市，我唔敢叫你唔買輪，怕你賺少咗怨我，阻人發達唔係幾好。不過提醒你兩點，第一不熟不做，過去你的投機表現不錯，用類似的方法做，應該還可以有好回報，試新方法有新方法的風險。第二買輪等如買期權，要預咗輸哂，無論你買來炒或買來對沖，時間值天天耗損，你過去買股無輸哂的經驗，我怕你心理準備不足，所以要買也只宜嚴格限注，唔想輸哂要死硬定位止蝕。揚長避短，就係搞好自己間買股公司的最好方法，搞好自己的投資方式，好過成日去問人攞冧巴。
昨日講Jessica的例子炒得較成功，今日想講一些另外一些例子。
網友叮噹咁講：「我間控股公司有第三個部門, 基金部 (月供同一筆過都有), 我公司成績：１．基金部最好 (結算, 三年月供plan賺42%, 19個月一筆plan賺54%)。２．投資部普通(玩左5個月，今日結算賺24%)。３．投機部好差(玩左5個月，今日結算賺4%, 玩左5個月)。我可能真係唔啱做老鼠，所以好少發言，從以上成績表似乎我要靠人哋(fund佬)先搵到食.」
陸羽仁唔知叮噹投機買乜，但如果佢的組合中有細價股，只賺４％絕不出奇，跑輸大市，皆因一隻細價股輸你幾十個％，可能嬴３隻都補唔番。再睇網友rayray的例子。佢話：「Mr. Luk， I am a new comer. I have lost much money in stock market in the past and now. I bought #340 at $1.55, today is $1.21. It has been $2.4 in June (I am so fool not to sell at that time). Someone told that it will rise next month, i.e. November. Should I sell it now or hold it? What do you think about this stock. Is it a bad or good k?．．．．．．．．． Please help to advise asap.If I sell #340, any other good suggestion for me to gain the lost?」（rayray的大意是他／她是新仔，在股市輸了很多錢，佢在１．５５元時買了中國礦業，升過２．４元無放，而家只有１．２１元（輸２１％），佢問賣唔賣好，佢好想買番第二隻股賺番輸咗啲錢）
Rayray買隻股唔可以稱為細價股，因為如今跌了下來如今仍有７２億市值，但可以話係一隻炒股，借殼變身礦業股，炒上高位，慢慢回番去近一年低位，潮流唔興炒這些股，自然無人花彈藥將佢再炒上去。睇完這兩個例子，有一個結論，做老鼠投機唔係咁易，特別係新仔無經驗，一買錯股唔識走，輸多贏少，老鼠尾都俾人斬埋，食幾件雞都補唔番。
所以我叫大家將自己當做投資控股公司，有幾個原因：
第一要計數，計自己公司各部門的業績，計總體業績，睇吓自己邊樣得。好似叮噹咁，如今買基金表現好，咪繼續買基金囉，基金可能選股好過你，也可能揸得長些，總之計埋管理費，佢都做得好過你o既投資部，就要接受買基金好過自己買。當然，你要小心而家基金買股都好有炒味，基金買紅色股，買金屬商品，買高增長國家，都在享受美元下跌製造出的泡沫，適當時候減持一部份落吓袋都無壞。
第二要揚長避短，投機唔得，就唔好放咁多錢投機，放多啲錢投資。直至自己試到更好的投機方法，才可以逐漸加注。好似rayray 咁，當日買熱炒的中國礦業，絕對係投機，可能佢當時不自知，無用投機的方法控制虧損。如今受虧所累，好想快快趣趣賺番輸咗o既錢，但財不入急門，買股方法唔啱，未總結好經驗，撲落去再買會唔又再輸呢？
第三投機要守紀律，止蝕係投機無法迴避的紀律。Rayray買完隻股升咗咁多，唔止賺，都要以買入價來止蝕，唔好輸俾佢。一個以錯誤方法買股的投機者，買了衰股可能好衰，買中喪升股好好都講唔定，這就是運氣，Rayray買了中國礦業跌落來死揸唔止蝕，如今輸好多；但如果她買了紅色股，跌落來死揸唔認輸，如今升番上去還有錢贏；但後者是贏運氣，不是贏方法。善炒者不靠運氣，以方法取勝。以Rayray的例子，如果有人今天介紹一隻紅色股俾佢，國指再升１０００點，所有紅色股都得，她買入的紅色股又急升，不過升完又急回，佢一樣死揸唔走，咁又如何呢？所以Rayray先要搞清楚自己是炒股還是投資，炒股要吼好入市位，買了貨要定止蝕，一到位要打靶，買了炒股升咗上去，有番三幾成水位，就算唔沽少少貨，最好都定止賺位，總之唔好輸番俾佢。唔學好基本功，在這種風高浪急的股市中，揀一個冧巴，以買一注獨贏的方式去炒，好易死o架。
