第一． 講投資。
股神巴菲特所講的「價值投資」，恰恰和賭馬集團所講的「賠率差」原理相通，一隻股論價值值１００元，但股民唔識寶，市價只是１０元，股神就話股價在合理價值有明顯折讓時，可以不斷買，賭馬集團發現有些馬仔買賠率偏低、有一定的取勝機會時，亦會不斷買。
第二． 講投機。
投機要注意機會率，研究大市出現不同價位的機會率，例如話這個月跌穿２００００點的機會有多大，假設係３０％，即係有７０％不會跌破，安全系數都幾高。在這個前題下，可以形成自己的投機策略，或者實行雨天購物策略，愈近低位，普通人會覺得愈危險，但對指數有機率的研判時，會發現愈近低位其實愈安全。如果這個月指數是在２０３００點至２１２００點之間走動，你話在２０５００點買貨安全的，還是２１０００點買貨安全的呢？普通人的感覺是２１０００點（這就是高追），我就話２０５００點（這就是低吸）。
第三． 穩陣投機者以機率控制風險。
有人可能話陸羽仁你唔好教人炒股啦，我又係o個句，你唔想炒，我教你唔識o既，你想炒時，我只希望你炒得聰明點，好多人係「又想炒又怕死」，也有怕死的炒法，就係分段候回吐入市。舉大家的愛股哈動（１１３３）為例，在QDII好消息公布後，我仍然話等９．５元低吸啦。當時的感覺是哈動回吐有機見９．５元，大約５０％機會啦，再回就唔回得太多啦，下邊９元都好硬，相信只有２０％至３０％機會到此位。所以９．５元開始吸一注，９．３元第二注，９．１元第三注，若入齊平均價９．３元，一成止蝕價８．３７元，跌到８．３７元打靶都抵輸啦。結果哈動的確見過９．５元，入到一注（其實在５月２５日日中見過９．３元的低位，不過是day low，唔係咁好彩可以入到，所以當只入了一注），如今有可觀升幅，你話只入一注唔夠噃，我就話成街都有咁多股，好多網友都話入爆倉無錢剩，旺市唔好驚無股揀，你驚自己唔夠錢仲好，若果隻隻都入得一注，但又隻隻入得平，隻隻都贏錢，條數加埋就會幾和味，這就是以機率研判、又要炒又怕死的炒法了。
