要防止自己「輸間廠」，亦有炒作心法，要「避免高追，切勿溝淡，硬手止蝕」。對少部份好貼市、幾專業的散戶來說，聞風追貨，是搵快錢的好方法。但大多數散戶幾唔貼市，例如返工唔睇得機，只能在早上或隔夜落盤或早上、中午預先落盤者，好難聞風追貨，股票升完一兩日，報紙寫到開巷，才去追貨，好易中伏，一中伏就陷入被動中，專業散戶上午追完貨下午都沽咗貨，你睇股價圖，連續兩三日幾枝大陽燭急升上來，到那時才買，這種股票雖然不排除會再升，但回吐的機會同樣大，所以避開已大幅急升的股票，想買都等回吐時買，是脫離陷阱的第一步。
好了，即使唔係高追，但都可能睇錯，你睇大市回吐已經回得夠，怎料買完繼續大跌，怎麼辦？你睇一隻股票有勢向上，點知買完就向下，怎麼辦？好多人買股見佢跌，第一個反應係唔信，會加注購淡，以拉低平均成本，低位買貨當然有好多例外情況，包括本來已設定分注買入，每低５％１注，同臨場溝貨不同；又例如你識睇隻股票基本價值，愈低愈買（咁就要睇你對自己的分析有幾大信心）；但好多散戶心態唔係咁，佢地見隻股買完下跌，入市再買，最簡單的心理是溝貨，拉低成本，這是堅持自己錯誤的行為（睇唔啱位入市就係一種錯誤），關鍵心理係「唔信隻嘢會跌」。記往不要溝貨，你買五隻股，一隻下跌，四隻上升，big deal？（好大件事？）你唔信邪，在下跌股份上加一倍注碼，假設你資金有限，沽其他股份攞錢來買下跌股，隻下跌股就由佔你組合２０％變成４０％，佢繼續跌你好大鑊。
跌得多唔對路，就要硬手止蝕。有人話炒股定一成止蝕，就經常要止蝕，唔掂。我寫文就話「硬守止蝕」，係對９０％對股市認識相當有限的散戶的建議，防止佢地「輸間廠」，對其他１０％懂得分析大市，分得開好股和雞股的散戶來講，不一定要硬守止蝕，請你把自己分類，對號入座。自認買股係幼稚園、小學生、中學生的要硬守止蝕，自認大學生不一定要止蝕，分唔清自己屬於邊類，睇唔清股份走勢，止蝕時咪沽一半留一半囉。如上述的投資組合，本來有２０％係蝕本貨，止蝕沽一半，變成只有１０％係蝕本貨，佢再跌時對整個組合的風險亦下降。電盈（０００８）是最經典的例子，香港電訊本來係大藍籌，俾盈科買了，可以先炒上２８元，再跌到低位得０．８元，０．９元（５合１前的價錢），買藍籌唔止蝕，竟然可以得番個零頭。買藍籌都要止蝕，你買的三、四、五、六線的股票，就更加要明白止蝕的重要，細股波幅大，你可以把止蝕位放在２０％，甚至更多，但如果有個高人話俾你聽跌３０％都唔駛止蝕，又唔理你買乜股，我既唔知呢個係乜高人，亦可以話佢最後會害死９０％散戶。
你可能話如果止蝕完又再升又點算？如果經常止蝕輸錢又點算？說到底，止蝕是防止有重大損失的手法，買保險要付保險費，你唔想有代價又想迴避風險，有無咁著數呀？炒隻雞股，止蝕完佢上番佢，你睇定再炒同一隻股，即使價位高啲，但安全啲，又係一個新交易，你又係另一條好漢了。
說到底你要慎擇入市位及入市方式，入市入得好，好少要止蝕，入市方法不好，經常要止蝕，要透過改善入市方式，減少止蝕的機會，要防止染病，而唔係有病食藥嫌佢苦。你或許會留意，陸羽仁在今年３月跌市後睇大市睇得樂觀，但睇位入市買股依然保守，唔到價買唔到就算，吼過第二次，吼過第二隻，有錢唔怕無嘢買，你們天天問咁多股，你驚無股買？入市位入得靚，入市後大市／個別股票好快向上，你買股就進入安全期，遠離止蝕位，可以放心坐吓貨。
炒股要止蝕的時候，下手要狠，不能手軟。買股可以手軟，打靶不能手軟。改善自己入市的EQ，不要人云亦云，揀好位入市，唔對路就止蝕，我就唔信你會「再輸間」廠啦。
